Potrèt: Fundashon Mariadal
KRALENDIJK – E organisashon di kuido médiko Fundashon Mariadal na Boneiru a manda seis pashènt Hulanda pa trato adishonal despues ku nan a keda ku keho serio di lomba despues di operashon na Colombia durante e mandamentu fo’i tera pa trato médiko.
Den un total di 35 pashènt ku último aña a hasi un operashon di lomba na Colombia, 22 tin keho despues di e operashon.
Despues Fundashon Mariadal a evaluá. A presentá e informashon ku a sali den e evaluashon na speshalistanan na Medellin, segun Javier Semeler, trahadó den komunikashon di Mariadal. “E fundashon mes no tin un speshalista di operashon di lomba. P’esei nos a laga un siruhano ortopédiko bini for di Hulanda.”
Víktima
Pa un tempu kaba ta konosí ku hopi pashènt ku hasi un operashon di lomba na Colombia, ta bini Boneiru bèk ku keho serio di lomba. Cedric Soleana a sufri daño serio na su lomba i a keda ku problema neurológiko i síkiko despues ku e tabata víktima di violensia. Aktualmente e ta biba na Hulanda temporariamente despues ku un operashon na Colombia a bai malu. Na Hulanda el a hasi un operashon pa drecha e daño i aktualmente e ta revalidá. Soleana no ta e úniko pashènt ku mester a operá di nobo na Hulanda.
Pa e 22 pashèntnan ku keho di lomba a traha un plan di kuido médiko, despues ku e siruhano ortopédiko a saminá nan. Segun Semeler fundashon Mariadal a bolbe biaha pa Colombia pa pone e hòspitalnan na altura di e pasonan ku a tuma. “Nan lo haña e rapòrtnan mira pa evaluashon interno.”
Coomeca
Despues di e grupo di seis hende, sobra di e pashèntnan tambe lo bai Hulanda pa tratamentu di nan kehonan, segun Semeler. E kompania di seguro médiko colombiano Coomeva ta evaluá e situashon ku a surgi ku e hòspitalnan na Medellin, kaminda a operá e pashèntnan. Fundashon Mariadal ta warda e resultadonan.
Na Boneiru tin papiá tambe ku algun pashènt tin infekshon. Mariadal ta laga sa ku nan no tin informashon tokante di esaki. E organisashon di kuido médiko ta bisa sí ku ta posibel ku pashènt di lomba por haña infekshon di un mikrobio durante e operashon. “Esaki ta un riesgo durante operashon di lomba. Nos ta warda informashon eksakto pa pone e hòspitalnan na Medellin na altura di e konklushonnan.”
Entretantu Fundashon Mariadal a tene un enkuentro pa tur pashènt di lomba i a informá nan tokante e posibilidat di infekshon.
Outor: Belkis Osepa