Frits van Ham – potrèt: Belkis Osepa
KRALENDIJK – Supermerkado More for Less no ta ekskluí ku nan lo bai wes si gobièrnu Boneriano rigurosamente keda mantené e preisnan máksimo pa sierto komestibel.
“Nos tin un ekonomia liber. Gobièrnu no por ferwagt nos bai bende bou di preis di kosto. Bo no por kombatí pobresa ku preis máksimo pasobra bo ta haña bo ku situashon Venesolano”, Frits van Ham, doño di More for Less, ta bisa disgustá.
More for Less i otro supermerkado na Boneiru resientemente a haña kontroladó di preis di e Kuerpo Públiko di Boneiru na nan porta. Ku un lista di kuater página di produkto den man nan ta kontrolá si e supermerkadonan ta kumpli ku e preisnan ku a determiná novèmber di aña pasá.
More for Less a haña un skual pa algun produkto i a saka entre otro galiña, karni mulá, aros, funchi i kuminda pa beibi for di su rèkinan. Si nan bende e produktonan aki riba preis máksimo e supermerkado ta riska un but di dies mil dòler.
Calvé
More for Less i otro supermerkado riba e isla ta kontra di preis máksimo. Diferente supermerkado, entre otro algun supermerkado chines i Van der Tweel, a saka sierto produkto for di e rèkinan. E produktonan riba e lista ta kai bou di un grupo di produkto di nesesidat vital. Van Ham ta haña e lista arbitrario. “Pakiko no tin un preis máksimo pa tur marka di aros? Anto ta pindakas di Calvé so ta kai bou di e maneho di preis máksimo, pero otro pindakas nò.”
Van Ham ta splika ku e preis máksimo di por ehèmpel un paki chikí di aros Blue Ribbon ta kai bou di su preis di kosto. “Mi ta sufri pèrdida. Mi trahadónan ke nan salario fin di luna. Si mi bende bou di preis di kosto, mi tin ku sera i mi trahadonan ta keda sin trabou. Esaki no ta e solushon.” Segun e supermerkadonan e maneho di preis máksimo di gobièrnu no tin konsekuensha solamente pa e supermerkadonan sino tambe pa e suministradonan i e importadónan.
Preis haltu
Ya ta basta tempu ku konsumidónan ta reklamá e preisnan haltu den supermerkadonan riba islanan BES. Un investigashon a mustra ku kompra na Boneiru ta sigur 40 porshento mas karu ku na Hulanda. Tur esaki mientras ku preisnan di produkto for di tempu di dolarisashon a subi enormemente i supermerkadonan no ta inkluí e bahamentu di e Algemene Bestedingsbelasting kompletamente den kuenta na e konsumidó.
Tòg Van Ham ta haña ku e argumento ku supermerkadonan tambe tin un responsabilidat sosial no ta bálido. “Si e konsumidó tin un bon entrada nan por paga. Gobièrnu mester hasi algu na e entradanan, sin desorganisá ekonomia. No por bringa e fayo polítiko di entrada na Boneiru riba lomba di e supermerkadonan. Nos ta buska produkto na Hulanda, ke men nos tin gastu di karga. Tambe nos tin gastu haltu di koriente pasobra mi tin airco den mi supermerkado. E konkurensha entre supermerkadonan na Boneiru ta masha pisa mes.”
Van Ham ta presidente di e Asosiashon di importadó i supermerkado boneriano i ke sinta na mesa ku gobièrnu mas pronto posibel. Si e kombersashon no tin resultado e ta pensa di bai wes. Nos ta den preparashon kaba. Ta dependé di gobièrnu.”
E asuntu tin atenshon di Bestuurscollege. Kuminsamentu di e siman aki e kolegio ta papia ku supermerkadonan i otro stakeholder riba e merkado di komestibel.
Outor: Belkis Osepa