Ramoncito Booi - Potrèt: Belkis Osepa

Ramoncito Booi – Potrèt: Belkis Osepa

KRALENDIJK – Ministerio Públiko (OM) a pidi un kastigu di sèl kondishonal di diesocho luna ku un periodo di prueba di 3 aña i 240 ora di servisio pa èks polítiko Ramoncito Booi durante e di dos dia di e kaso Zambezi. Wes Irma Lips ta sentensia dia 15 di aprel.

 
Durante un seshon máratòn di kasi 12 ora a trata e úniko keho ku a sobra kontra Booi. E keho ta trata falsifikashon di dokumento den un akta notarial di transportashon durante dil di tereno.

 
Tereno
Fiskal Leomar Angela meskos ku defensa a tuma su tempu pa argumentá durante su rekisitorio i replikashon pakiko Ramonsito Booi ta dilanti wes. Segun Angela, Booi desididamente a bende tereno pa un sierto preis miéntras ku e balor korekto tabata hopi mas haltu.E akta notarial di transportashon ku a traha i ku mester a konsiderá komo outéntiko, tabata falsifiká, segun Angela. Tin un suma di 450 mil florin ku no por detektá.

 
Angela: “Booi tabata sa ku e terenonan tabata bal masha hopi . Nos a hasi hopi investigashon di e suma di plaka skondí, pero no ta kla ta kiko a pasa ku e plaka. Ta kla si ku a sera dil ku a generá por lo ménos 450 mil florin pa Booi. E motibu ta den e fail di korupshon.

 
No reseptivo
Abogadonan Knoops a defendé Booi; nan a defendé e pareha El Hage tambe. Abogado Geert-Jan Knoops na kuminsamentu di su defensa a pidi wes Lips pa deklará OM no reseptivo òf sikiera duna OM un sankshon pasobra OM a pasa e tempu den kua e investigashon i e huisio penal a tuma lugá. El a referí na hurisprudensia pa soportá su ponensia.

 
Knoops: “E durashon di e investigashon tabata inhumano den su largura. E pasamentu di tempu largu aki a stroba e prosedura hurídiko, miéntras ku ta un keho so a sobra.” Angela a refutá e punto aki ku e argumento ku mester tene kuenta ku e komplehidat di e investigashon Zambezi.

 
Den su defensa Knoops a presentá e supuesto inosensia tambe. El a sita ku kontra di Kódigo Penal a duna e failnan di Zambezi na otro partido, manera entre otro Fundashon Bon Gobernashon i prensa. Ademas e maneho di media ku OM tabata hiba tabata pone ku e notisianan tabatin un impakto negativo.

 
Badr Hari
Knoops a hasi e komparashon ku e kaso di Badr Hari na Hulanda kaminda tambe tabatin hopi atenshon di media i dunamentu di fail. Despues di denunsio korte a bisa ku si e notisianan tokante di e failnan ta falta di OM mester sigui sankshon. Segun Knoops e daño pa su klientenan a oumentá enormemente den kurso di añanan.

 
Angela a para e krítika tokante dunamentu di fail. El a bisa ku e no sa di ki manera e periodistanan a haña nan informashon.

 
Knoops tabatin krítika riba Angela su argumentashonnan, ku segun e abogado tabatin muchu interpretashon ku poko echo. Segun Knoops e pruebanan no a keda determiná. “Ta trata di suposishon di OM, miéntras ku e investigashon i e interogashonnan di Rijksrecherche tabata asombrosamente sugestivo i manipulativo. OM tin vishon di tùnel, pero komo magistrado bo mester para habrí pa senario alternativo.”

 
Segun Knoops OM, via un porta patras, ta trata di trese korupshon gubernamental bou di atenshon di korte, ku preteksto di motibu. Kaminda anteriormente korte a determiná kaba ku lo no inkluí e echonan aki den trato di e kaso Zambezi. “OM mester ta kontentu ku El Hage i Booi no a hasi denunsio. Esei lo a resultá den un investigashon di Rijksrecherche.”

 
Outor: Belkis Osepa