Foto: BUVO
ORANJESTAD — Tiara Air a haya suspension di pago definitivo pa un luna. Abogado Eugene Martis, cu ta e bewindvoerder apunta dor di hues pa e compania di aviacion, ta confirma esaki.
Den un reunion entre Tiara Air, su creditornan y hues, tur e creditornan a bay di acuerdo pa duna Tiara Air un luna pa asina yega na un manera pa gana placa y na un respuesta pa loke ta si lo por paga creditornan a lo menos parti di nan placa bek. Pa por yega na e votacion di ayera, a lo menos un mayoria di e creditornan di Tiara Air mester a bay di acuerdo.
Segun Martis, e voto pa duna e aerolinea local un luna pa drecha su cuenta tabata unanime. Mester bisa tambe cu e reunion di ayera tabata un momento decisivo pa Tiara Air. Si acaso creditornan lo no a bay di acuerdo, bancarota lo tabata inevitabel pa e aerolinea. Minister Otmar Oduber di Turismo y Transporte ya caba a declara cu gobierno ni Aruba Tourism Authority (ATA) lo yuda Tiara un biaha mas cu un injeccion di placa.
November ultimo, parlamento a aproba pa duna Tiara alrededor di un miyon dollar pa e compania keda opera un siman largo. Desde e momento ey, trahadornan a keda lunanan largo sin haya paga. Tin di nan a kita di trabou, entre otro tambe managernan, locual a conduci cu e siman aki a suspende permiso di Tiara Air pa bula temporalmente. Aworaki e compania ta bulando atrobe, pero bou cierto condicionnan.
Extension
Suspension aki – cu ta diferente na esun anterior ya cu accionistanan a bay di acuerdo y no ta cu djis hues a impone – por wordo extendi ariba iniciativa di bewindvoerder, cu aprobacion di hues. Un extension lo no por ta pa mas cu un luna y e limite ta na un aña y mey. Si ta nota cu Tiara Air no por genera placa mas, lo bay mester declara bancarota toch. Pero segun Martis, un factor hopi importante den decision di e creditornan pa duna Tiara Air un chens mas ta cu Alejandro Muyale, propietario di Tiara Air, a anuncia cu e ta negociando awo cu un inversionista nobo.
Martis no kier divulga ken e accionista ta, pero e ta confirma cu ta trata di un persona di pafo di Aruba. Loke di otro banda ta keda problematico ta cu Tiara den ultimo lunanan no a logra diversifica su rutanan pa asina por bira menos dependiente di mercado Venezolano (80 prociento di e negoshi di Tiara Air ta cu Venezuela). “Mester tuma cuenta cu pa habri otro rutanan, mester inverti hopi placa. Por ehempel, si bo cuminsa bula pa Brazil e ora bo mester habri un oficina eynan tambe pa cuminsa. Y Tiara no tin e placa ey pasobra e ta na Venezuela ainda” , asina Martis ta splica.
Reunion den Staten
Mientras tanto Partido Democracia Real a pidi un reunion urgente di Parlamento, pa asina haya sa di gobierno kico ta e pasonan specifico cu lo bay tuma pa yuda entre otro trahadornan di Tiara Air. PDR tambe kier sa kico Reino por haci pa yuda Tiara Air haya su 25 miyon dollar cu ainda ta mara na Venezuela.
Autor: Ariën Rasmijn