Abogado Knoops ta papia ku e sospechosonan – potrèt: Belkis Osepa
KRALENDIJK – E tim di defensa di abogadonan Knoops ku palabra fuerte a kritiká e investigashon Zambezi i e argumentashon di Ministerio Públiko (OM) durante e trato tokante kontenido di e kaso Zambezi.
Riba e di tres dia di seshon, abogado Geert-Jan Knoops a tene su defensa den e kaso kontra e pareha Burney El Hage i Ginia El Hage-Cicilia. Djaluna fiskal Leomar Angela a eksihí un kastigu den sèl kondishonal di dies luna ku un tempu di prueba di tres aña i tambe 240 ora di servisio. Ta kulpa e pareha di falsifikashon di dokumento i tambe di labamentu di plaka relatá na froude di hipotek. Wes Irma Lips – meskos ku den e kaso kontra Ramonsito Booi – ta sentensiá dia 15 di aprel.
Selektivo
Knoops den su defensa ta bisa ku Angela a bini ku hopi suposishon pa por kondená e pareha El Hage. Knoops ta haña ku for di e investigashon di OM a bin sali na kla ku tin un falta di konosementu di mundu bankario. “OM a trata e medionan di prueba selektivamente. Den e computernan tin hopi material ku por eksonerá. No a skohe pa laga un eksperto bin kalkulá ophetivamente kiko e pareha a kontribuí finansieramente durante konstrukshon di nan kas.”
E tim di defensa tabata masha malkontentu tambe ku e interogashonnan kaminda ‘konsientemente tabata brua’ e testigunan, segun Knoops. “Tur deklarashon di testigu ta sin balor. No tin niun sorto di ophetividat i honestidat. E pagamentu na banko den fase tabata pa kontrolá si tabata usa e plaka pa konstrukshon i no pa otro meta. OM ta kompletamente herá.”
Atenshon
Fiskal Leomar Angela tabata kòrtiku den su kontestanan komo reakshon riba e defensa di Knoops. “Mi a elaborá hopi kaba i mi a tené mi na e echonan manera nan ta pará den e akusashon. Mi ta haña importante pa enfatisá ku a duna hopi atenshon na e kaso aki. Mi no a traha selektivamente i mi no a duna e defensa difikultat. E esensia di e argumentashon di e abogado naturalmente ta ku e no por bai di akuerdo ku e vershon di OM.
Abogado Knoops-Hamburger no tabatin un palabra bon di bisa di e aktitut ei di Angela. “Mi ta haña remarkabel ku fiskal, despues di a skucha nos kuater ora largu, no ta menshoná nos vishon niun ora so. Mi no por imaginá ku no tin niun reakshon òf defensa.”
Impakto
Na fin di e seshon e pareha El Hage a haña oportunidat pa tuma e último palabra. Ginia El Hage-Cicilia i Burney El Hage a pinta kon grandi e impakto di e kaso Zambezi ta riba nan bida. Segun Ginia El Hage-Cicilia e kriterionan ku OM a usa pa labamentu di plaka i trafikashon di droga no ta aplikabel riba su famia. “OM a pone nos den mundu di droga i e sirkuito kriminal sin niun base pa esaki.”
E pareha ademas a ekspresá krítika riba prensa, e partidonan di oposishon di Boneiru i Fundashon Bon Gobernashon ku a trese e kaso dilanti den korte. “Niun hende no ta prekupá pa mi derechonan i di mi famia. E proseso aki a kousa nos masha hopi doló.”
Outor: Belkis Osepa