Foto: Ariën Rasmijn
ORANJESTAD — Minister di Salubridad Publico Alex Schwengle a pidi Servicio Veterinario pa haci un inventarisacion di e cantidad di carni Hulandes cu ta drenta Aruba. Esaki segun Pieter Barendsen, hefe di Servicio Veterinario.
Motibo pa esaki ta cu Onderzoeksraad voor Veiligheid na Hulanda a saca un rapport basta critico ariba industria di carni na Hulanda, pero tambe na Union Europeo. Barendsen: “Mi ta di aplaudi cu minister ta mustra interes y kier sa esaki . Nos team ta bay percura tambe pa e minister haya tur datonan cu mester.”
Hormonanan
Hefe di Servicio Veterinario tambe a wordo pidi pa bin cu recomendacionnan. “Mi punto di bista ta cu mester relativa cierto aspectonan. Por ehempel, tin paisnan den Latino-America cu mag exporta carni pa Union Europeo, pues tambe pa Hulanda. Aruba ta importa gran parti di su carni for di paisnan aki y for di Merca, na unda porcierto no tin prohibicion ariba uza cierto hormonanan den produccion di carni cual ta prohibi na Union Europeo.
Estado di produccion di carni na e paisnan Latino-Americano aki no ta miho cu na Union Europeo. Si ta stop di importa carni Hulandes, cual ta un cantidad hopi mas chikito cu di paisnan Latino y Merca, e ora mester ta consecuente y stop importa carni for di paisnan aki tambe”, asina Barendsen ta splica.
Carni local
Veterinaire Dienst mes tambe tin su abatoir na Barcadera. Tin dos keurmeester eynan cu a haya nan certificacion na Hulanda y ta controla e bestianan ora nan drenta y despues cu nan a wordo habri. Mas tanto porco y cabrito ta wordo mata y procesa na e abatoir chikito aki, cu un par di baca y cabay so pa aña. Galiña local no ta wordo mata eynan. “Esey hende ta haci na cas, despues cu e galiña no ta duna webo mas.”
Barendsen ta admiti cu e lo kier tin mas bista ariba matamento di galiña aki na Aruba. Pa loke ta e bestianan cu ta wordo procesa na Barcadera, barendsen ta bisa cu, apesar cu no tin control hopi estricto ariba uzo di antibiotica y for di unda e cuminda di e bestianan ta yega (tin por ehempel criador cu ta duna nan yerba awa di pos, cu por cualkier cos toxico den dje), e cantidad di bestianan cu no ta pasa e control di e keurmeesternan ta basta chikito. Na 2013 for di un total casi 2000 bestia, 14 so a wordo nenga.
Control
Tin un cantidad di bestia cu si por pasa control, por ehempel si no mira e injeccion di antibiotica cu si a wordo duna, pero mirando e escala di e operacion (carni local ta constitui solamente 1 porciento di henter e mercado) e riesgo ta uno cu por biba cune, segun Barendsen. Un storia otro ta e alrededor di 60 carnicerianan na Aruba, incluyendo esnan den supermercado.Cada un di nan ta haya dos biaha pa aña un bishita di Servicio Veterinario, mainta trempan. Anto pa aña, 20 di nan mester stop nan operacion temporalmente pa haci limpi segun e standardnan di Sevicio Veterinario.
Siman cu a apasa Onderzoeksraad vvoor Veiligheid na Hulanda a publica un rapport basta negativo ariba produccion di carni na Hulanda y Union Europeo. Control ariba siguridad di producto lo ta hopi malo y entre otro te hasta lo ta uzando partinan di bestia cu normalmente ta tira afo de productonan cu ta yega serca consumidor.
Autor: Ariën Rasmijn