E rèkinan bashi kaminda tabatin lechi pa beibi – potrèt: Belkis Osepa
KRALENDIJK – E Kuerpo Públiko Boneiru den palabrashon ku supermerkadonan, importadónan i doñonan di trabou, a disidí pa suspendé e kòntròl di preis máksimo den supermerkado pa un máksimo di tres luna.
E supermerkadonan riba e isla kasi un siman pasá a saka diferente produkto for di e rèkinan. Djaweps a yena e rèkinan atrobe i ta bende e produktonan pa mas ku e preis máksimo determiná.
Na Boneiru e siman aki a surgi komoshon ora ku no por a haña diferente produkto di sierto marka i emboltura mas, manera galiña, karni mulá, aros, lechi pa beibi, ariña di funchi i pindakas. E supermerkadonan a saka e produktonan for di rèki despues ku kontroladó di preis di gobièrnu bonerianu a parti prosès verbal, pasobra nan tabata bende sierto komestibel riba e preis máksimo ku gobièrnu a pone.
E supermerkadonan no ke sufri pèrdida ku bendementu bou di preis di kosto. Lei a disidí ku e supermerkadonan for di novèmber di aña pasá ta kastigabel i ta riska un but di dies mil dòler si nan surpasá e preisnan máksimo.
Impase
Djamars último diputado Edsel Winklaar, enkargá ku Desaroyo Ekonómiko a sinta na mesa ku e Asosiashon di Supermerkado i Importadó, representante di supermerkado chines i e servisionan relatá ku kòntrol i mantenshon, pa sali for di e impase. E situashon a kuminsá bira angustioso i segun oyente ku tabata yama radio lokal na Boneiru asta tabatin skarsedat di un marka speshal di lechi di beibi.
Segun Winklaar e partidonan mester yega na un bon solushon kaminda ta komponé un pakete básiko di artíkulo di nesesidat vital primario ku preis ku e konsumidó por paga. Presidente Frits van Ham di e Asosiashon di Supermerkado i Importadó ta satisfecho ku e akuerdo ku a logra. “Nos a yega na un desishon sin kondishon delantá. Nos sa muchu bon ku e entradanan di sigur trinta te kuarenta porshento di bonerianonan ta apsolutamente insufisiente pa por kome na drechi. Nos ke tuma e responsabilidat ei si pa riba término hopi kòrtiku bini ku un sierto pakete pa aliviá e nesesidatnan primario.”
Entrada
Van Ham ta enfatisá ku no ta e preisnan di e produktonan ta e problema, sino e entradanan riba e isla. Un komishon di seis hende den e tres lunanan binidero ta bai studia e problema di preisnan máksimo i e pakete básiko di produkto. Den e komishon tin representante di supermerkado hulandes, supermerkado chines, e bònt di konsumidó boneriano UnkoBon, e Tienda pa Konsumidó i e servisionan di gobièrnu envolví. E komishon ta haña konseho di e ofisina di investigashon hulandes SEO.
Outor: Belkis Osepa