E lidernan di e delegashon ta firma e akuerdo final di e Konferensha di Reino – potrèt: Arien Rasmijn
ORANJESTAD – E di dos edishon di e Konferensha di Reino a kaba ku palabrashon tokante tópiko ku tur hende por tabata di akuerdo kuné. Asuntu manera tráfiko liber di persona, e derecho pa kanselá Lei di Reino i e Komishon di Disputa a bai atras den prioridat òf no a haña un akuerdo definitivo.
Na lugá di esaki Hulanda, Kòrsou, Sint Maarten i e pais wespet Aruba a hasi palabrashon tokante un taskforce nobo pa promoshon di derecho di mucha, koperashon ekonómiko i pa trese mas koheshon.
Presidente di e konferensha Mike Eman a bisa ku ta un “dia históriko ku un deliberashon konstruktivo kaminda a logra hopi resultado konkreto”. Asina den e deklarashon final ta indiká ku lo lanta un taskforce speshal ku – a base di rekomendashon di un rapòrt di Unicef ku a publiká aña pasá – ta bai garantisá derecho di mucha den e parti karibense di Reino.
Mas koheshon
Oumento di e koheshon den Reino mester sosodé segun stimulashon di kontakto entre organisashon, instansha, misa i siudadano. Reforsamentu di e lasonan aki segun Eman mester sirbi komo bùfer pa ora e paisnan pa kualke motibu den futuro no por ta di akuerdo polítikamente.
Ta enfatisá e koperashon ekonómiko entre e kuater paisnan. E relashonnan ku ta eksistí kaba i e funshonnan di hub di e paisnan ta haña atenshon èkstra. E plan pa desaroyá zona speshal ekonómiko riba e islanan BES pa importashon mas barata ta mas konkreto. Lo envolví Aruba, Kòrsou i Sint Maarten den esaki.
Ta konsiderá e tres paisnan karibense komo asina yamá pais SIDS, pais chikí ku sierto limitashon natural, ekonómiko i di eskala. Di e manera aki Hulanda ta sostené nan den e área di defensa, siguridat hudisial i wardakosta. Pasobra Statüt tambe ta garantisá esaki.
Den e akuerdo final a inkorporá ku den e kuadro aki lo buska posibel sosten pa otro asuntu tambe. Eman ta konsiderá e garantia konhunto di derecho di mucha komo un adelanto riba esaki, pero no a menta otro asuntu potenshal kaminda Hulanda den futuro lo por yuda ku plaka.
Tráfiko liber
E partnernan den Reino tambe a trata e resultadonan di e kuater gruponan di trabou ku a instalá na 2011. Den e último dos añanan e gruponan aki entre otro a trata e tráfiko liber di persona, posibel opstákulo i diferente interpretashon di Statüt i introdukshon di un komishon di disputa pa kestion hurídiko entre e paisnan.
Tokante algun asuntu sí a hasi palabrashon miéntras ku a pone algun otro kestion riba agènda pa un otro momento. Despues ku a puntra nan, e partnernan a indiká ku no a trata e asuntu di tráfiko liber di persona ainda.
Minister Ronald Plasterk di Relashonnan den Reino a deklará ku e grupo di trabou espesialmente a konsentrá riba e mihó organisashon di tráfiko entre e paisnan mes. Su deklarashon anterior den prensa tokante e kondishonnan di tráfiko liber ta para lòs di esaki, pero brevemente a papia tokante di esaki sí ku e otro partnernan.
Lei di Reino
Hulanda ketu bai tin e deseo pa, preferibelmente via un kònsènsùs ku tur pais, traha un Lei di Reino. Plasterk ta bisa ku e otro paisnan a indiká di ta warda ku masha interes riba e momentu ku di bèrdè mes e lo trese e punto aki dilanti. A papia tokante di un komishon di disputa si, pero no tin palabrashon fiho ainda. E deseo di Kòrsou i di Sint Maarten pa introdukshon di un derecho di anulashon unilateral di Lei di Reino a keda simpelmente anotá den e deklarashon final.
Outor: Ariën Rasmijn