Ivar Asjes
WILLEMSTAD – Un biaha mas tin frikshon den seno di partido Pueblo Soberano (PS). Awor ta posishon di minister-president Ivar Asjes ta na diskushon. E frakshon den parlamento di e partido maron lo ke un otro kandidato pa e puesto di minister-president.
Esaki di akuerdo ku un artikulo den e matutino Vigilante. Sinembargo tantu Asjes komo líder di frakshon di PS Melvin “Mac” Cijntje i tambe presidente di partido Edward Joseph ta nenga e informashonnan aki kategorikamente.
“Kada biaha tin rumor nobo den un intento di destabilisá e koalishon”, Asjes a duna di konosé. E no ta na haltura di ningun frikshon ku ta hungando i ta papia di un komplòt kontra di e koalishon di PS/PAIS/PNP i miembro independiente di Staten Glenn Sulvaran. “Pa hopi tempu kaba tin tur tipo di rumor. Prome tabata bisa ku tin hende ku a hòrta e lèptop di Wiels. Awor ta tende ku tin parlamentario ku ta sospechoso den e kaso di asesinato di Wiels i ku frakshon di PS lo no ke mi mas.”
Joseph a bisa ku e asta no ta lesa korant mas. “Mi a stop di lesa korant paso mi ta lesa eiden kosnan ku mi lo a hasi kualnan mi mes no ta na haltura di dje. E tambe ta bisa di no tin informashon ni indikashon ku e frakshon ke kore ku Asjes.
Cijntje no ke a papia di un komplòt pero mas bien di “gueranan personal”. “Ta kosnan ku bo tin ku biba kune ora bo ta den polítika. E líder di e frakshon tambe ta konfirmá ku no tin nada ta hungando den e frakshon pa ku un deseo pa remplasá Asjes.
Cijntje, Asjes i Joseph ta referí na reunionnan semanal entre tur minister di PS i e frakshon huntu ku e presidente di partido. “Den e reunionnan aki nunka a bin algu dilanti ku ta indika ku tin un problema ku e minister-president”, tur tres a bisa.
Trinidad
Sinembargo tin indikashon ku sigur un miembro di frakshon di PS a aserka Carlos Trinidad pa wak si e ta interesá pa bira ministe-president. Si esaki ta un akto solitario of ku tin mas miembro di e frakshon ta sostené e akto aki no ta konosí. Trinidad kende na 1012 tabata minister pa PS ta desmentí. “Mi no ta forma parti di e frakshon di PS pues mi no ta na haltura ta kiko ta biba den seno di e frakshon. Pero, mi no a papia ku niun miembro di e frakshon riba e tópiko aki.”
Outor Gino Bernadina