Hóbennan di Formashon Sosial Obligatorio ta yuda drecha monumento – potrèt: Dick Drayer
WILLEMSTAD – Gobièrnu di Kòrsou, ministerio di Defensa hulandes i diferente organisashon di monumento a topa na Fort Beekenburg na e península di Caracasbaai.
Hóben drop-out den un proyekto speshal di Formashon Sosial Obligatorio ta haña un di dos oportunidat. Via edukashon i trabou, entre nan drechamentu di monumento, nan ta haña un lugá bèk den komunidat.
Kañon
Djabièrnè e proyekto a haña atenshon durante e ponementu spektakular di un kañon di 200 aña riba e murayanan di Fort Beekenburg. E kañon aki di siglo 18 tabatin algun aña kaba drumi pafó di e fòrti despues ku ladron a trata di hòrt’é. Ku ayudo di un helikòpter Cougar di Defensa a pone e ’24-ponder’ bèk na su lugá. Ku esaki e batrèi di e fòrti ta kompleto atrobe.
Katalisadó i faktor ku ta uni den e proyekto di formashon ta e fundashon ‘Herstelling’ di Amsterdam. E fundashon aki tin diesocho aña kaba ta traha ku hóben ku difikultat pa haña nan lugá den komunidat; nan ta drecha fòrti di Stelling van Amsterdam, un sirkulo di 45 fòrti rondó di Amsterdam. Via e relashon speshal entre munisipio di Amsterdam i Kòrsou awor e fundashon ta usa su métodonan pa yuda drecha Fort Beekenburg. P’esi algun hóben ta sigui un estudio na Amsterdam.
Kuminsamentu
François Van der Hoeven, sekretario di e fundashon Maritieme Archeologie Curaçao (Stimacur) i ku añanan largu ta envolví den Fort Beekenburg, ta spera ku e koperashon ku Amsterdam por ta un kuminsamentu pa por drecha otro monumentu tambe di e manera aki.
Outor: Dick Drayer