Foto: Ariën Rasmijn
ORANJESTAD —Tripartite entre parlamentonan di Aruba, Corsou y St. Maarten a cuminsa. Tur cos ta mustra cu delegacionnan parlamentario di e tres paisnan Caribense di Reino kier sigui pa gran parti riba caminda cu nan gobiernonan respectivo a coy hunto cu Hulanda den Conferencia di Reino siman pasa.
Awe, mayan y otromayan e topiconan di cooperacion economico entre e paisnan y e rapport cu Unicef a publica aña pasa riba derechonan di mucha ta bay ta halto den agenda. Siman pasa lidernan di tur tres pais hunto cu minister Ronald Plasterk di Relacionnan den Reino a sera acuerdonan duro riba topiconan aki den Conferencia di Reino. Y mescos cu durante Conferencia di Reino, agenda di tripartite ta mustra cu lo no mishi cu e topico controversial di trafico liber pa Hulanda.
Gracita Arrindell, presidente di parlamento na St. Maarten a enfoka riba rapport di Unicef y cu e kier mira adelantonan riba esaki. Arrindell tambe kier mira institucion di un academia di legislacion, y ela mustra riba topico di apelacion den casonan huridico di impuesto. Dos topiconan aki por cierto tin un origen Arubiano, siendo cu Andin Bikker di Partido Democracia Real ta esun cu a traha e papernan aki pa wordo trata.
‘Aruba tin cu participa den cooperacion economico’
Presidente di parlamento di Corsou, Marcolino ‘Mike’ Franco ta conta di su banda cu pa su delegacion e topiconan di cooperacion economico y suavisamento di rekisitonan pa por biaha entre e paisnan Caribense di Reino, tin prioridad. Corsou cu St. Maarten ya caba tin legislacion cla pa traha cu otro economicamente y Franco kier mira pa Aruba tambe participa den esaki. Ademas e ta haya cu Aruba y su pais mester por coopera pa loke ta creacion di un hub entre Europa y Latino-America.
Competi cu otro lo haci ambos pais daño, y e idea ta pa reparti recursonan pa asina ambos pais por beneficia di dje, segun Marcos. Pa loke ta trafico di personanan entre Aruba, Corsou y St. Maarten, esaki mester bay cu hopi mas eficiencia. Mester elimina e asina yama papel di Aduana. Tambe kier pone e impuesto di aeropuerto riba mesun tarifa pa residentenan di tur tres pais.
Pa e tripartite aki topiconan a wordo contribui door di tur tres pais. Topiconan cu lo bay wordo trata ta entre otro relacion bilateral entre Aruba y Corsou ariba tereno di mercado liber, suavisamento di rekisitonan pa personanan por establece na Aruba, institucion di un asina yama academia pa legislacion, apelacion den casonan legal di impuesto, cooperacion ariba tereno di energia y produccion y sumistro di awa y coriente y oportunidadnan economico riba tereno di nacionalidad di barconan. Fraccion di AVP cu ta forma mayoria na Aruba ademas kier mira si por re-institui e Weganan di Reino of e Weganan Interinsular.
Un tipo di Festival di Arte di e paisnan den Reino tambe lo carga aprobacion di e fraccion. MEP, e partido mas grandi di oposicion kier trata legislacion pa loke ta calidad di awa, ya cu esaki falta na Aruba. Pa cu esaki lo bay tin un presentacion durante e tripartite.
Autor: Ariën Rasmijn