Fiskal mayó Rick Noordhoek – potrèt: Today/Hilbert Haar
PHILIPSBURG – Ministerio públiko tin bon bista riba e aktividatnan di banda kriminal na Sint Maarten, pero no tin kapasidat pa hèndel nan. Asina fiskal mayó Rick Noordhoek, ku na februari a susedé e fiskal mayo di transishon Hans Wesselink, ta bisa.
“Den e grupo di direkshon nos a deliberá ku polis ta ku kiko banda kriminal ta okupá nan mes”, Noordhoek ta bisa. Nos a wak tambe kua banda ta stroba komunidat mas tantu. Pero e pregunta ken nos mester hèndel mas promé si nos por a kontestá mes ora. No tin kapasidat p’esaki. Tur kapasidat ku tin ta usa pa investigashon ku ta kore ainda i pa insidente manera atrako.”
Minister di Hustisia Dennis Richardson a pidi Hulanda manda kuater hende pa reforsá Landsrecherche i dos sekretario di parkèt pa Ministerio Públiko. Segun Noordhoek Hulanda a primintí di manda dos reshèrshi i un sekretario. Aktualmente Landsrecherche tin shete reshèrshi. “Bo por bien multiplika e sifra aki ku tres pa bo yega na e kantidat deseá”, Noordhoek ta bisa.
Suspenshon
Landsrecherche tin nan mannan yen ku investigashon ku ta kore ainda i na insidente resien ku a resultá den suspenshon di dos polis i dos trahadó di duana. Un amtenar tambe ta wardando un suspenshon, Noordhoek ta bisa. “Investigashon di integridat i korupshon ta tuma hopi tempu.” E tabata referí na e investigashon di korupshon di Jos van Rey na Hulanda ku 40 pa 60 reshèrshi a traha riba dje dos aña largu.
Investigashon di froude
Pronto un sospechoso di e investigashon di froude na Ofisina di Turismo di aña 2010 mester bini dilanti wes. E investigashon aki ta tokante froude ku kompensashon finansierio diario kaminda e tempu ei a menta direktor Regina Labega, su trahado di PR Edward Dest i e èks diputado di turismo Frans Richardson komo posibel sospechoso.
Noordhoek a bisa ku no tin niun progreso den un posibel investigashon hudisial di labamentu di plaka di `èks minister di Salubridat Públiko Maria Buncamper-Molanus. Esaki no ta solamente pa falta di personal sino espesialmente pa falta di eksperto di investigashon finansiero.
Outor: Hilbert Haar