Un ‘rekuerdo’ ku Van den Heuvel a piki resientemente na Jan Kok – potrèt: Elisa Koek
WILLEMSTAD – Direkshon di bientu, velosidat di bientu i koriente di awa. Esakinan ta e asuntunan di mas importante ku mester determiná si e zeta ku a drenta bahia di Jan Kok dia 17 i 18 di ougùstùs 2012 a bini di Refineria Isla. Fundashon Monumentenzorg i Seashore a keha e refineria komo esun responsabel pa e ‘oilspill’, e shushamentu di zeta.
Awe e kaso a bini dilanti. Despues di e defensa di tur dos abogado, wes lihé a proponé e posibilidat di un akuerdo. Esaki lo a enserá ku Isla no ta atmití kulpa pero sí e lo tuma un gran parti di e posibel gastunan pa su kuenta.
Dia 17 i 18 di ougùstùs 2012 a haña un kantidat grandi di zeta den e saliñanan di Jan Kok. Bosero di Refineria Isla, Kenneth Gijsbertha, a bisa prensa ku e refineria lo tuma su responsabilidat i a rekonosé ku e zeta a bini di Isla. Despues el a retirá loke el a bisa.
“Gijsbertha no ta un eksperto i el a trata solamente di trankilisá pueblo”, abogado Robert Rijnberg di Isla ta bisa. Segun e abogado no por prueba ku e zeta ku a drif drenta e ref na Sint Marie a bini di e refineria. “Tabatin un lèkmentu di zeta sí riba 18 di ougùstùs na Bullenbaai, pero esaki no tabata asina dañino manera e zeta ku tabatin den awa na Jan Kok. Ke men mester redusí e but ku mester paga drástikamente.”
Koriente
Segun abogado Rogier van den Heuvel no tin ningun duda di unda e zeta a bini. “Jan Kok ta keda banda di e terminal di zeta, Isla ta lèk zeta regularmente i e zeta ku ta lèk na COT, bientu ta supla mand’é direktamente den direkshon di Jan Kok”, tabata un resúmen di e defensa di e abogado. Robert Rijnberg, abogado di Isla tambe a usa e koriente di awa komo defensa. “No por pronostiká kon e awa ta bai kore. Ademas na algun entrada e awa ta kore mas lihé ku otro kaminda i e demandantenan no a tene kuenta ku esaki.” Rijnberg no por a produsí dokumento di e korientenan riba e dianan ku e zeta a kore drenta e bahia.
Plaka pa investigashon
Pa Marcel van der Plank, presidente di Fundashon Monumentenzorg, ta espesialmente importante ku lo evitá ‘desaster’ asina. “Mester bini un solushon pa e kos aki no sosodé nunka mas. Ademas mester hasi investigashon di e daño aktual. No tin plaka pa hasi e investigashon aki na un manera drechi ke men nos ke haña e plaka aki di Isla. Naturalmente mester paga e plaka tambe ku a usa kaba pa limpia tur e zeta. Ta manera wes tabata sinti bon kiko Van der Plank ke men pasobra ta un akuerdo asina mes el a proponé. Pa un posibel solushon pa evitá e tipo di insidente aki a trese un konstrukshon di brùg dilanti.
Isla ta komplasiente
Ounke Rijnberg ta enfatisá ku Isla no ta responsabel pa e zeta na Jan Kok, el a indiká ku Isla ta komplasiente pa e proposishon di e akuerdo. “For di e promé dia e BV tabata envolví den e limpiamentu di e zeta i a gasta sentenar di miles di florin na esaki kaba. Si kita tur e gastunan aki i si un partido independiente investigá e situashon aktual, nos por papia di un akuerdo.”
E partidonan e simannan ku ta bini ta haña tempu pa huntu nan yega na un solushon. Si esaki no logra wes lo sentensiá e kaso dia 19 di mei.
Outor: Elisa Koek