Presidentenan di parlamentonan di St.Maarten, Aruba y Corsou ta firma e acuerdonan haci den Tripartite. Foto: Ariën Rasmijn
ORANJESTAD — Tripartite entre parlamentonan di Aruba, Corsou y St. Maarten a termina awe cu dos resolucion y un lista di 8 acuerdo.
E mensahe tabata cla: Aruba, Corsou y St. Maarten kier traha hunto mas intensivamente riba diferente tereno.
Miembronan di comission Rene Herdé y Elmer Wilsoe na palabra
‘Wetgevingsacademie’
E prome resolucion ta trata institucion di un asina yama ‘Wetgevingsacademie’, den cual lo bay educa huristanan legislativo. Tur tres pais ta haya cu mester tin un institucion local cu por produci tipo di huristanan aki cu ta specialisa den necesidadnan specifico di cada pais. E idea ta awo pa trece mocionnan na e diferente ministernan encarga cu Educacion na unda ta urgi pa pone e diferente universidadnan na e paisnan desaroya un curriculum conhuntamente.
Unicef
Di dos resolucion ta trata riba e rapport cu Unicef a publica aña pasa riba situacion di mucha y hobennan na Aruba, Corsou y St. Maarten. E delegacionnan a dicidi pa conhuntamente formula puntonan di salida pa asina por cumpli cu e recomendacionnan di e rapport. Idea ta pa entre otro duna mas sosten na famianan den lantamento di nan yiu, traha mas activo hunto cu stakeholders y bin cu mas campaña di conscientisacion pa loke ta respet pa derechonan di mucha.
Casonan di impuesto
Aruba, Corsou y St. Maarten tambe a palabra cu Aruba lo bay manda e dos otro paisnan su concepto di ley riba apelacion den casonan huridico di impuesto. E idea ta pa Corsou y St. Maarten traha nan propio version di dje, pero cen concordancia cu e ley di Aruba. Registro di testament di tur tres pais te dia di awe ta na Corsou. E parlamentonan di e tres paisnan lo bay consulta cu nan respectivo ministernan di Finanzas ariba posibilidad di institui un propio registro. Mientras tanto Corsou ta bay percura pa den dos pa tres luna tin suficiente personal na e registro eynan.
Aruba y Corsou ta bay tene un bipartite pa yega nan un acuerdo di comercio liber. Na prome instante esaki lo bay encera mercancia. Mas laat e acuerdo lo por wordo amplia cu entre otro servicionan. E ora St. Maarten lo por wordo inclui den e acuerdo, ya cu pa mercancia nan no tin impuesto di importacion. Pero prome cu por yega na un acuerdo di mercado liber, mester institui bek e asina yama Ministeriële Samenwerkingsraad (MSR), cu a wordo disolvi riba 10-10-10. Un grupo di trabou a wordo institui pa percura cu e plan aki progresa y tin un MSR atrobe.
Cooperacion economico
Un grupo di trabou tambe a wordo institui pa mira unda e tres paisnan por amplia nan cooperacion economico, specificamente riba entre otro trafico aereo y riba laman, negociacionnan riba acuerdonan di comercio y impuesto y un posicion mas prominente den missionnan economico di Hulanda. Tambe a institui in grupo di trabou pa wak si e Weganan di Reino lo por bin bek. Finalmente a papia riba facilitacion di biahamento entre e paisnan. Ainda tin obstaculonan innecesario manera e asina yama papel di Aduana cu mester yena den avion y mester warda pa e biahe bek. Paisnan a acorda pa inventarisa e problemanan y bin cu posibel solucionnan pa e proximo reunion interparlamentario (IPKO) na juni venidero.
Autor: Ariën Rasmijn