Marina Melis DSB i Kevin Brown DSUK
KRALENDIJK – E problemátika rondo di buriku na Boneiru ta den un impase. Un kontra investigashon ta bisa ku e burikunan ta salú i bon kuidá. Marina Melis di Donkey Sanctuary Bonaire (DSB) ke un paro dje akusashonnan falsu kontra dje. Di otro banda siudadanonan ta puntra nan mes si gobièrnu ta haña buriku mas importante ku hende.
Flora Molina di Rincon ta haña ku e kuido dje burikunan boneriano no mester bai akosto di e pueblo di Boneiru. Sí gobiernu mester stipulá un maneho realístiko pa atende ku e burikunan, segun Molina. E diskushon tokante e burikunan ta sigui krese. Ainda partidonan den e kuestion aki no a sali afó kiko mester bai sosodé.
Último siman tabatin hopi moveshon den Bestuurscollege. Representante di The Donkey Sanctuary United Kingdom (DSUK) a sinta na mesa serka diputado James Kroon i Marina Melis di akohida di buriku huntu ku oponente di e proyekto di kue buriku, e gruponan di interes ‘Citizens for a Better, Safer and Animal Friendly Bonaire’ i ‘Todd Mission Ranch Wild Burro Protection League’. Kuerpo Públiko Boneiru entre otro a skucha e organisashon di naturalesa Stinapa tambe den e asuntu aki.
Investigashon independiente
Kevin Brown di DSUK huntu ku un kolega dos dia largu a hasi un investigashon independiente na DSB. Nan a eksaminá buriku den naturalesa tambe i tambe nan a papia ku e veterinario ku ta hasi e kastrashonnan. DSUK ta un di e akohidanan di mas grandi di buriku na mundu. E organisashonnan di interes a aserká DSB ku informashon tokante e mal kuido i salu di buriku na Boneiru. P’esei DSUK a disidí pa bishita e akohida di buriku boneriano sin anunsiá i sin sita.
Brown ta refutá e akusashonnan di e organisashonnan di interes. “E burikunan aki na Boneiru ta den bon man. Ta muchu trempan pa bisa ku e buriko boneriano ta di rasa nubio. Te awor ta parse manera no tin diferensha entre e burikunan domestiká aki i e rasa ‘Nubian Ass’. Mester investigá esaki mas aleu. E problema di mas grandi aworaki ta: kiko ta bai hasi ku e buriku bonerianu?”
Rektifikashon
DSUK ta proponé pa tur partido pone nan proposishonnan riba mesa pa yega na un solo plan di enfoke di e problemátika di buriku. Marina Melis a stòp di kapturá i kastra buriku for di dia ku eilandsraad a aseptá un moshon. E ta ranka sali sí pa yuda buriku den problema òf den kaso di aksidente di outo. Despues di e resultadonan di e kontra-investigashon el a pidi e organisashon di interes pa stòp imediatamente ku rumor falsu tokante su persona i DSB. E organisashonnan di interes dilanti di e representantenan di DSUK a deklará di ta dispuesto pa rektifiká.
Turista
Molina ta haña ku e kuido di buriku no por bai a kosto di pueblo. “Gobièrnu mester bini ku un maneho ku turista no por duna e burikunan kuminda mas. Hiba e burikunan un kaminda leu den naturalesa, duna nan awa i kuminda. E burikunan ta siña keda einan. Awor nan ta bini siudat bin buska kuminda.”
Tokante protekshon di buriku Molina ta ta hopi kla: “Bo no por protehá buriku mas mihó ku hende. Awor gobièrnu ke protehá buriku, pero si nan multipliká i kousa aksidente, ken ta paga mi outo? Gobièrnu mester mantené un kantidat fiho di buriku ku mester keda.”
Outor: Belkis Osepa