Andy Melaan i Nozai Thomas despues ku a eksonerá nan
KRALENDIJK – “Mi ta mira e indemnisashon den e kaso Spelonk komo un rekonosementu i rehabilitashon importante pa Nozai Thomas i Andy Melaan.” Esaki ta e reakshon di abogado Geert-Jan Knoops despues ku huntu nan a haña sigur 1.4 mion euro despues di e eror hurídiko den e kaso aki.
Nozai Thomas ku tabata será pòrnada 4 aña i mei ta haña 677.430 dòler (488.000 euro) i Andy Melaan – ku tabata será ocho aña – ta haña 1.292.687 dòler (931.000 euro).
Indemnisashon
Ta promé be den Hulanda Karibense ku a paga indemnisashon asina haltu pa hende inhustamente kondená. Novèmber aña pasá a eksonerá Thomas i Melaan despues ku e tim di defensa a bini ku prueba nobo ku nan no ta kómplise na e asesinato riba e rumannan Martis na 2005.
Despues a sigui pleita ku Ministerio Públiko (MP) tokante pago di e indemnisashonnan. MP no a mustra ku nan ta dispuesto pa negoshá tokante di e indemnisashonnan. Djei e tim di defensa di abogadonan Knoops a pidi Korte pa tuma un desishon pasobra nan no por a yega na un akuerdo ku MP. Esaki ta un di e faktornan pakiko korte ta hustifiká un rekompensa mas haltu, segun Knoops.
Interes
Knoops ta mustra riba e echo ku e aktitut rígido di MP i e reakshon di Korte riba esaki ku un indemnisashon mas haltu ta importante pa kasonan di revishon kaminda ta eksonerá hende ku a kondená pòrnada. “E echo ku MP no tabata yega na un akuerdo rápido a empeorá e tristesa i e gravedat pa e dosnan. Den futuro estado hulandes lo mester kai na pena di interesnan di e personanan aki mas mihó”
Korte a alsa e indemnisashon standart ku un faktor sinku. Defensa a pidi pa subié ku un faktor ocho. Na prinsipio e tim di Knoops a pidi 1,6 mion euro pa Melaan i 850 mil euro pa Thomas.
Faktornan ku ta oumentá daño
Segun Knoops ta trata di un kaso úniko, kaminda Korte a tene kuenta ku faktornan ku a oumentá daño manera atenshon di prensa, stigmatisashon pa motibo di e persekushon i e impakto riba e bidanan di Thomas i Melaan. Tambe e daño síkiko i e preshon di polis ta konta den e konsiderashon di e haltura. Ounke e rekompensanan ta mas abou ku a pidi, defensa ta satisfecho. “Esaki lo ta un presedente importante pasobra korte ta rekonosé ku e kategoria di hende eksonerá aki a sufri èkstra.”
Nozai Thomas i Andy Melaan ke depositá e indemnisashonnan den un fondo ku un terser partido lo manehá. Via e fondo aki lo manehá e fondonan pa nan futuro i di nan yunan i nan famianan. Tambe nan ke empeña pa otro hende ku a kondená pòrnada na Antia i den eksterior.
Gastu di e ekspertonan
Ainda Korte no a honra e di dos petishon pa kubri gastu di e ekspertonan. Ta trata di pago di eksperto forénsiko i di telekominikashon, guiansa sikiatriko i gastu di boluntario. Den e di dos petishon tambe a kalkulá e gastunan di e abogadonan pa bringa e indemnisashon di Thomas i Melaan. Korte a indiká ku nan ke mas informashon tokante e gastunan di e abogadonan.
Abogadonan Knoops a hasi e trabou di eksonerashon di e eror hurídiko aki pro deo. Estado hulandes a rekompensá un porsentahe di e gastunan ku nan a hasi.
Outor: Belkis Osepa