Ramoncito Booi emoshoná despues di e veredikto – potrèt: Belkis Osepa
KRALENDIJK – Ramoncito Booi i e pareha Burney El Hage i Ginia El Hage-Cicilia a reakshoná aliviá i emoshoná ora wes Irma Lips a papia e palabranan di redenshon: “Bo ta eksonerá.” E tres sospechosonan den e kaso Zambezi ta apsolvé di froude, falsifikashon di dokumento i labamentu di plaka.
“Nunka mi no tabatin duda den e kaso Zambezi”, Burney El Hage ta bisa den un reakshon riba e apsolushon di tur e echonan na kargo. El Hage sevéramente ta kritiká e echo ku Ministerio Públiko (MP) a persiguí nan sinku aña largu, sin tin prueba pa e akusashonnan.
Belkis Osepa tabata na e veredikto i a papia ku Burney El Hage i Ramoncito Booi
Prepará
EL Hage: “Mi no a duna niun hende informashon robes. P’esei mi no tabatin duda.” Tòg El Hage ta aliviá ku e parti aki di e kaso den korte a pasa. E ta prepará pa e echo ku MP por apelá. “Despues di sinku aña mi a kultivá poko defensa kontra esaki ke men mi ta konta ku esei, pa mi por sigui.”
Burney i Ginia El Hage – potrèt: Belkis Osepa
Wes Irma Lips a argumentá ekstensamente pakiko e echonan na kargo no tabata sufisientemente legal i konvensedó pa por sentensiá e sospechosonan di Zambezi. Segun wes, no a prueba ku ta intenshonalmente a falsifiká dokumento i ku e sospechosonan a aktua kontra bèrdat ora nan a pidi fiansa hipotekario i a tene un debe afó. E akusashon di labamentu di plaka di hipotek, a base di echo ku a rechasá anteriormente, tambe a bari for di mesa.
Ramoncito Booi tambe a sali pafó ku awa na wowo despues di e veredikto di Lips. A apsolv’é di trahamentu di un akto di transpòrt falsu pa benta di dos pida tereno na Boneiru. Booi: “Mi mester tuma tempu pa laga e kos aki senk bai fòndu i mira kon mi ta bai sigui ku mi bida. Pa kuminsá mi ta bai deliberá ku nos abogadonan, despues nos lo mira.” E tambe ta prepará pa un eventual apelashon di MP. MP a rekurí na kasashon kaba kontra e echo ku no a inkluí korupshon atministrativo den e kaso penal.
Spekulativo
E tim di defensa di abogadonan Knoops tambe a reakshoná aliviá. “E apsolushonnan hurídikamente i realmente ta mas ku hustu, mirando e argumentashon sumamente spekulativo di MP kaminda e formashon di fail masha sugestivo di parti di Rijksrecherche hulandes tambe a yama atenshon”, segun Geert-Jan Knoops den un deklarashon. E ta indiká ku e sospechosonan ta eksperienshá e apsolushon manera un forma di rehabilitashon.
Ademas wes Irma Lips a rechasá e defensanan di e abogadonan tokante e pasamentu di un término rasonabel di sentensiá, i tokante violashon di suposishon di inosensia. Segun korte e dagfarnan ta balido i korte ta outorisá pa trata e kaso. MP ta reseptivo den e persekushon, ke men Lips a indiká ku no tin motibu pa skòrs e persekushon.
Outor: Belkis Osepa