Flora Molina ta kòmbersá ku representante di Ombudsman Nashonal – potrèt: Belkis Osepa
KRALENDIJK – “Bo no ta mira polis na Rincon. Polis mester drenta bario i no warda te ora ta lat kaba.” Esaki ta un gritu pa ayudo di Flora Molina ku a bai sinta na mesa ku representantenan di Nationale Ombudsman.
Ombudsman mas i mas ta último rekurso pa siudadano na Boneiru ku pega na instanshanan di gobièrnu. Mas i mas siudadano ta optimista ku ombudsman por yuda nan.
Molina ta haña ku awor si ta basta. Rinconeronan ta kansá di e falta di polis den e bario di mas bieu di Boneiru. Tin speransa ku ombudsman por trese un solushon. E kehonan no ta toka polis so. A menta otro servisio di gobièrnu i instansha tambe durante e konsultanan ku e representantenan di ombudsman. Un keho ku ta tende hopi ta ku ta manda hende di Ponsio na Pilato.
Satisfecho
Hans Oosterveer i Marjolein Bannier ta masha satisfecho ku e kantidat di siudadano ku por haña e kaminda pa e konsultanan. Ounke hopi be no tabata bini mas ku 15 hende nan ta satisfecho pasobra ántes a yega di sosodé ku ni un hende no a blo.
Aña pasá ombudsman a risibí 25 keho. E aña aki tabatin 41. Ta ferwagt ku e kantidat ta sigui subi, Hans Oosterveer ta bisa. E representantenan a eksperienshá ku nan presensia ta pone hende akudí mas fasil. Oosterveer: “E hendenan ta apresiá ku nan por entregá nan keho serka nos personalmente. Esei ta masha bon, pasobra asina nos por kontribui na mehorashon di e kalidat di servisio di gobièrnu.”
Fin di aña e representantenan di Ombudsman Nashonal ta bini Hulanda Karibense atrobe.
Outor: Belkis Osepa