Foto: BUVO

Foto: BUVO

ORANJESTAD — Gerencia di e aerolinea local Tiara Air a haci un peticion na Departamento di Labor pa por retira 58 empleado, cual ta dos tercera parti di full su personal.

 
Director y propietario Alejandro Muyale ta confirma cu siman pasa ela manda un peticion pa por retira 58 empleado, entre nan piloto, copiloto, stewardess y mecanico.

 
Prome cu e problemanan di likides a cuminsa, Tiara Air tabatin 130 trahado. Ya caba hopi trahado a retira y despues di e retironan aki, alrededor di 30 empleado lo resta. Motibo pakico a tuma decision aki ta cu otro fin di luna ta yegando y negociacion cu posibel inversionista nobo – Muyale ta bisa cu tin diferente inversionista stranhero cu lo ta interesa pa injecta placa den su compania – no ta cla ainda.

 
Payroll
Ademas, e placa cu gobierno Venezolano debe Tiara Air no a drenta tampoco. Mientras tanto, Tiara Air ta den un suspension di pago cu su creditornan y Muyale tin cu mustra huez cu e ta tumando pasonan pa baha gastonan pa su compania por sobrevivi. Cada luna, huez y bewindvoerder di Tiara air mester evalua pa wak si ta continua cu e suspension of ta declara bancarota. “Si nos yega fin di luna cu un payroll haltisimo cu nos no por paga, e chens cu huez lo declara e compania bancarota ta bay ta hopi mas grandi. Y si declara compania bancarota, niun hende no ta haya nada mas. Ni e trahadornan ta haya nan salario pendiente di e lunanan cu nan no a cobra. E tabata un paso duro pero mi mester a haciele pa protehe e placa nos debe nan”, segun Muyale.

 
E ta spera si cu mientras cu Departamento di Labor ta evalua su peticion, por ta ya caba por sera un acuerdo cu un inversionista of Venezuela ta paga e 21,8 miyon dollar na entrada cu ta debe Tiara Air for di 2013 of e par di miyon di dollar cu ta debe desde comienso di e aña aki. Asina lo no mester di kita niun hende. Muyale ta confirma cu no a ofrece trahadornan un pakete di retiro ainda.

 
“Mi ta kere cu na final esey lo por wordo ofreci, pero si bin cu pakete lo mester warda riba placa di Venezuela prome pa por duna esakinan”, segun e director y propietario di Tiara Air. Muyale ta bisa cu aworaki tin dialogo cu autoridadnan Venezolano y cu tin perspectivanan nobo. Cierto companianan te hasta a ricibi nan placa pa 2014 te aworaki, pero Tiara no ta un di nan.

 
Reunion di trahador
Mientras tanto, trahadornan a cu via un email di nan dunador di trabou y un carta di Departamento di Labor a ricibi e noticia desagradabel cu a pidi pa nan retiro a reuni cu otro awetardi. Serca trahadornan aki e preocupacion mas tanto ta cu nan lo por keda ambos sin trabou y sin haya nan salario cu desde januari no a wordo paga. “E punto ta pa tene e compania na bida cueste loke cueste, anto aworaki riba lomba di trahadornan”, un copiloto a laga sa na prensa local. Trahadornan aworaki tin poco otro opcion, fuera di of tuma nan retiro of purba di larga e proceso di nan retiro pa asina por ta negocia algo otro cu retiro.

 
Autor: Ariën Rasmijn