Fiskal mr. Gert Rip ta sali korte
WILLEMSTAD – E hòmber ku dia 5 di mei a tira lider di Pueblo Soberano Helmin Wiels mata, Elvis Kuwas mihó konosí komo ‘Mònster’, a duna un konfeshon kompleto. Ademas lo el a bisa ku ta duel e.
Esaki a bin sali na kla den e di dos seshon pro forma ku a tuma lugá awe. Banda di esaki el a hasi un deklarashon tokante di e papel ku e otro sinku sospechosonan a hunga den e asesinato, di kua entretantu dos a fayesé kaba.
A tira e supuesto shafùr, Raul Martinez mihó konosí komo ‘Bolle’, mata dia 17 di mei i a bent’é na laman, i Luigi ‘Pretu’ Florentina riba 7 di sèptèmber a mata kurpa den su sèl.
Término
E seshon pro forma tabata nesesario pasobra e diferente términonan di detenshon preventivo di tres di e kuater sospechosonan ta kaduká djabièrnè. Den tur kuater kaso wes a husga ku nan mester keda será. Ku e atmishon di Kuwas i e enbolbimentu di e otro sospechosonan segun wes tin sufisiente opheshon serio pa prolongá detenshon.
Fiskal Gert Rip ademas a indiká ku e mester di mas tempu pa por finalisá e investigashon. Mester tende testigu ainda i mester kontrolá e deklarashon di Kuwas riba aspekto importante.
Defensa a ataká e investigashon di Ministerio Públiko (MP) i RST, e tim hulandes di asistensia di reshèrshi. Segun nan mester deklará MP no reseptivo pasobra di tur manera esaki ke mira kulpabilidat di e sospechosonan i a fòrsa e konfeshon di Kuwas den un temporada ku e no tabatin abogado.
Seshon tokante kontenido
Wes no ker a hinka su man den e nèshi di maribomba aki. E no ta rechasá e argumentashon, pero e ta haña ku mester bini mas investigashon pa e por tuma un desishon. Lo trata esaki te dia di e seshon tokante kontenido na ougùstùs. Promé esaki lo tabata na mei, pero a posponé pa 4 di ougùstùs. Hustisia lo reservá sinku dia pa trata e kaso. Famia di Helmin Wiels via ruman hòmber Aubert Wiels a deklará ku posibel deklarashon di duele ta un paso den bon direkshon. E famia ta kontentu tambe ku wes a duna e tim di investigashon mas tempu. “Ta importante pa bèrdat bini riba mesa. Ku un prolongashon kisas ta haña mas bista riba e dunadó di enkargo, loke ta bon pa e kaso”, segun Aubert Wiels.
Outor: Dick Drayer