Pelíkula lokal ‘Kasita’ – potrèt: Belkis Osepa
KRALENDIJK – Pueblo di Boneiru a haña chèns djaluna último pa presensia e estreno dje pelíkula filmá na Boneiru ‘Kasita’. E pelíkula akí a lanta e interes pa sa mas di kultura i historia Boneriano, segun Gabri Christa eskritor i direktor di e pelíkula.
‘Kasita’ ku ta un pelíkula di korto durashon filmá aña pasá ku aktornan Boneriano i ku presentashon di Grupo Tutti Grutti, i Grupo Kayena. E protagonistanan hóben ta Tharia Phelipa i Idea Reid. Gabri Christa ku a nase na Kòrsou pero a biba for di mucha na Boneiru, ta kontentu ku e reakshonnan lokal durante e presentashon den e sala di komunidat di skol Boneriano SGB. Tambe e ta satisfecho ku e reakshonnan internashonal despues ku Kasita a estrená tantu na Miami komo na Amsterdam.
Mensahe
Tharia Phelipa i Idea Reid ta dos mucha ku huntu ku e kachó Janny a trata na trese diferente mensahe pa e públiko durante nan aktuashon. Kasita ta tokante Sol (Tharia) i Luna (Idea) ku ta pasa den yen abentura i na dado momentu ta buska un kasita pa Janny, pasobra segun nan Welita Mai e kachó no por biba den kas.
Tharia ta kontentu ku su aktuashon i ta splika e balor di e kasitanan di katibu. “Mi a siña ku no por usa e kasnan ei komo kas di kachó. Ta algu di kultura i historia di Boneiru. No por hasi nada otro ku nan.” Idea Reid ku ta papia Ingles só, a wak e pelíkula na Miami kaba. Promé ku su aktuashon e no tabata por papia Papiamentu. Idea: “Mi a lesa e skrept. Mi no tabata sa niun palabra na Papiamentu. Awor mi kier siña Papiamentu.”
Interes
Kasita a habri un festival di pelíkula na Miami i tambe na Amsterdam e estreno di Kastia ya a tuma lugá. E pelíkula ta parti di un seri di pelíkula kòrtiku ku Christa a skirbi i dirihí den kuadro di diáspora Afrikano. Segun Christa tur kos ku por wak den e pelíkula tin su historia. “Boneiru tin hopi historia i kultura. E pelíkula aki a lanta interes pa e isla aki. I esei tabata mi meta.”
Outor: Belkis Osepa