Olga Saleh ta sali for di un korte ku vigílashon pisá – potrèt: Dick Drayer
WILLEMSTAD – “E kaso Magnus ta duru duru pegá”, Olga Saleh, abogado di Elvis ‘Monster’ Kuwas ta haña. Ta sospechá e último di a tira Helmin Wiels mata aña pasá dia 5 di mei. Pa Saleh e kos ta bon kla: “Kasi no tin prueba tékniko-forénsiko; Ministerio Públiko (MP) no por sentensiá sin un konfeshon di mi kliente.”
Durante di e di dos seshon pro forma den e kaso di e asesinato di Wiels – e kaso Magnus – Saleh ku e opinion aki ta pará direktamente kontra e opinion di fiskal Gert Rip. Esaki ta bisa ku e kaso ta kla. “E investigashon ta koriendo den bon direkshon, nos mester tende kuater testigu ainda i verifiká e deklarashon di konfeshon di Kuwas”, segun Rip.
Ménos kastigu
Saleh ta reakshoná riba loke Rip a trese dilanti den e seshon. E ta bisa ku a haña e konfeshon di Kuwas ilegalmente. “Na un momento ku mi kliente no tabatin abogado, no tabata sinti su kurpa bon i a kere ku e lo haña ménos kastigu si e konfesá, el a konfesá”, e ta postulá. Rip ta ninga esaki. “Nos a bisa ku mientras tantu ku e apelá na su derecho di keda ketu, MP lo pidi kastigu di bida largu. No ta trata di niun sorto di dil.”
Di kasi tur interogashon a traha grabashon di vidio i oudio, pero nèt nò di e interogashonnan ku a revelá algu. Nèt e ora ei lástimamente aparatura a daña”, segun Saleh.
Dia 28 di yanüari e relashon entre Kuwas i su abogado anterior a kibra. Dia 26 di febrüari Komishon di Derecho Penal a nominá i añadí Saleh komo abogado nobo. Fiskal a tuma kontakto ku Saleh riba 5 di mart pa papia tokante un dil.
“Probablemente e (Kuwas, red.) no tabata koperá mashá, sino komo MP bo no ta apelá na e abogado. Djei a keda ketu te dia ku riba 22 di mart mi ke lesa den korant ku tòg a interogá mi kliente i ku el a hasi un deklarashon; ademas a kore hib’é Hulanda, pa su propio seguridat”, Saleh ta bisa. “Anto awor MP ta bisa tambe ku ta pa e mes motibu di seguridat ei mi kliente no ke pa mi ta envolví.”
‘Chapusero’
Segun Saleh MP ta ‘chapusero’. E ta haña ku e ta frustra den su trabou pa representá interesnan di su kliente mas mihó posibel. “Naturalmente ta difísil kaba pa hasi esaki, ora ku e ta nuebe mil kilometer mas leu te na Hulanda, pero si nan kòrta tur kombersashon telefóniko tambe ora mi papia kuné, esei si ta di mas ridíkulo.”
MP a atmití den e seshon ku e aparatura di graba a daña, pero no ku ta falta kombersashon telefóniko den e fail.
E argumentashon di Saleh ta ku MP ta hunga un wega sushi. “Mi ta defendé un sospechoso. Tin hopi riesgo. Pero mester hunga e wega honestamente sí.” E ta haña ku aktualmente esaki niun ora so no ta e kaso i, dia 4 di ougùstus ora e proseso tokante kontenido kuminsá, e ke laga deklará MP no reseptivo.
Outor: Dick Drayer