Sint Joris ta un kaminda ku sa usa hopi pa tira sushi ilegalmente – potrèt: Elisa Koek
WILLEMSTAD – Denter di un luna ta bai ofresé na Staten e Ordenansa Insular Promoshon di Orden Públiko i Protekshon di Komunidat (OIPOPPK), ku ta inkluí Lei di Tiramentu Ilegal di Sushi . “E ministerionan konserní a traha un lei nobo. Ta un proposishon di urgensha ke men e lei por bira aktivo atrobe den algun luna, en todo kaso den seis luna”, José Sillié, hurista na ministerio di Hustisia, ta konta.
E lei ta un bònder di lei riba tereno di Orden Públiko i protekshon di komunidat. “E lei aki tabata eksistí kaba promé ku 10-10-’10, pero mester a skibié di nobo pa Pais Kòrsou.”
Tiramentu di sushi revelá riba social media
Komo ku e lei tabata inaktivo tur hende por a basha sushi riba kaya sin sankshon. Selikor anteriormente kaba a bisa ku tabata un trabou di pi’e palu. “Nos tin tres dòmtrùk ku diariamente ta hisa sushi ilegal, ma despues di poko ora ta yen di sushi atrobe. Sin e lei aki ta un trabou irealisabel pa tuma akshon efikasmente”, manager di Operations John Cijntje ta deklará. E lei ta perkurá pa ora gara hende ku tira sushi ilegal òf si mira nan hasi esaki riba ‘social media’ por klap nan un but. Despues di 10-10-’10 Ministerio Públiko no a haña niun prosès verbal pa motibu di tiramentu ilegal di sushi.
Sushamentu di zeta
E sushamentu ku zeta tambe ta den e lei di OIPOPPK. Tiramentu di zeta na laman ta kai bou di un otro lei. “Esaki ta kai bou di e tratado MARPOL”, hurista na Wardakosta Cynthia de Veere ta bisa. “Esaki ta parti di e landsverordening i no tin nada di hasi ku e lei di OIPOPPK. Wardakosta por aktua i semper a aktua den kaso di bashamentu ilegal di zeta, sea si ta for di un barku of na tera.”
No tin lei drechi pa hasi propaganda kant’i kaminda – potrèt: Dick Drayer
Mas lei
Banda di tiramentu ilegal di sushi a inkorporá desena di lei den e lei OIPOPPK. “Un ehèmpel ta propaganda kantu di kaminda.”, un trahadó na polis, Rodney Manbré, ta konta. “Tur kaminda kant’í Schottegatweg tin bòrchi di propaganda, pero bon mirá esaki no ta pèrmití niun ora so. Tampoko no ta pèrmití pa bende korant kant’í kaminda, pero tur e kosnan aki a tolerá último añanan, pasobra nos no por a duna but.”
Otro lei den OIPOPPK ta prostitushon, bashamentu ilegal di ekskrementu, molèster di boroto, protekshon di animal, propaganda polítiko i trafikashon di koper. “Espesialmente e bendementu di koper a bira un problema grandi”, hurista Sillié ta sigui konta. “Koper ta trese hopi plaka pa enkubridó, ta p’esei mas i mas tin hòrtamentu di waya di koriente.” Pa motibu di hòrtamentu di waya koriente por bai oranan largu den un bario. Hopi be ta te manisé meinta Aqualectra por solushoná e problema.
Promé paso
E lei OIPOPPK ta kai bou di e ministerionan di Hustisia, Asuntunan General, Transpòrt i Planifikashon Espasial i Salubridat, Medio Ambiente i Naturalesa. A skibi e lei di nobo, oument’é i adapt’é, den deliberashon ku e kuater ministerionan. “A pone e promé paso i fin di aprel kuminsamentu di mei ta present’é na Staten. Kaba tur ministerio mester revisá i aprobá e lei pa despues e bai pa gobernador. Ta di spera ku aki seis luna por buta sankshon atrobe”, segun Sillié.
Outor: Elisa Koek