Famia Maduro – potrèt: Jamila Baaziz
ROTTERDAM – “Nos a nase na Kòrsou, pero pa nos bai biba ei awor nos mester pidi un pèrmit di estadia. No ta straño?
Maiky i Zoila Maduro ke muda pa Kòrsou ku nan famia. E pareha tin reumatismo i otro keho di salú ku ta hasi bida na Hulanda pisá. Pero pa nan remigrá ta mas kompliká ku nan a kere.
“Komo ku nos mayornan no a nase na Kòrsou, nos mester pidi un pèrmit di estadia i trabou”, mama Maduro a deskubrí. Riba su computer den e bario Charlois na Rotterdam e ta buska mas tantu informashon posibel tokante e remigrashon pendiente. Pida pida ta deskubrí tur parti di e pùzel. “Nos yunan, Rosaly i Rushwin, a nase na Hulanda, ke men pa nan tin un otro prosedura na vigor.” Tata Maduro: “Ta manera bo “no tin derecho” riba bo isla. Mi a nase na Kòrsou, mi mama a nase na Aruba i mi tata na Cuba. Pero mi no por yega niun kaminda asina numa.”
Prosedura
Yu di Kòrsou na Hulanda ku ke bai nan isla bèk ta haña nan ku yen di prosedura, tin be hopi kompliká. Espesialmente si nan mayornan òf nan yunan no a nase na Kòrsou. Den kaso di remigrashon tin mas kos di hasi ku solamente inskribí den registro sivil na Kranshi. E ofisina di migrashon Na Kaminda a ripará ku tin hopi hende ku no sa kua kaminda nan mester kana pa loke ta prosedura di remigrashon. E ofisina pa un pago ta regla asuntunan práktiko i formal.
Langereis ta un di esnan ku a tuma e inisiativo. “Hopi yu di Kòrsou ta kere ku nan por djis yega inskribí na Kranshi i ku esei ta sufisiente, pero hopi biaha esaki no ta e kaso. Sigur si ta trata di yu ku a nase na Hulanda, òf si por lo ménos un di e mayornan di e migrante no a nase na Kòrsou, tin otro prosedura na vigor.”
P’esei famia Maduro ta tuma nan tempu pa regla nan asuntunan trankilamente, di nan pèrmit di estadia te ku e mandamentu di nan kosnan. “Di hende ku nos konosé nos ta tende ku tin be ta saka hende for di Kòrsou pasobra nan no a regla nan papelnan na drechi. Nos ke chèk tur kos bon.” Entretantu poko poko nan ta soña chikí chikí ku nan bida nobo na Kòrsou. “Ménos doló, temperatura agradabel i un bida mas relahá ku poko menos prekupashon.”
Salimentu
E eskoho pa sali for d Hulanda no ta masha difísil. “Akinan nuebe luna pa aña nos ta sintá paden”, tata Maduro ta bisa. “Pa motibu di nos salú nos no por traha mas. I Hulanda a bira karu. Nos tin hopi gastu pa keinta kas, pasobra den friu nos tin hopi molèster di nos reumatismo. Nos no por paga esaki. Nos no por kontribuí nada mas na Hulanda, ke men mihó nos bai biba aya.”
E motibunan di famia Maduro pa bai biba Kòrsou bèk no ta úniko. Ministerio di Desaroyo Sosial resientemente a laga hasi un investigashon di e faktornan di migrashon ku ta influenshá un eventual regreso pa Kòrsou. Por lesa esaki den e rapòrt Ayó òf te aweró. E klima i e estilo di bida riba e isla pa hopi hende ta hunga un ròl den remigrashon.
Eksperiensha nobo
Famia Maduro no sa ainda kon nan bida na Kòrsou lo bira. “Nos a biba einan un temporada masha kòrtiku komo mucha, ke men bon mirá ta un eksperiensha nobo”, segun mama Maduro. Pero tin sufisiente plan: tata ta kontemplá di kumpra un mashin grandi di traha pan i yu muhé Rosaly ta dispuesto di gana poko plaka ku su kushinamentu. Pa Rushwin ku ta mentalmente desabilitá di tur manera e isla ta ofresé mas oportunidat pa e por pasa tempu pafó dushi di dje.
Outor: Jamila Baaziz