Foto: Arubahuis
ORANJESTAD — Mas cu mitar di e studiantenan Arubiano na Hulanda ta cambia di estudio den nan prome aña. Esaki ta un di e conclusionnan di un rapport recien di departamento di enseñanza di Arubahuis na Den Haag.
Ta trata aki di un rapport basa riba tres investigacion chikito cu Arubahuis a haci for di 2010 te cu 2013 bou studiantenan Arubiano na Hulanda. Cada aña alrededor di 300 bursaal Arubiano ta bandona e isla pa bay studia. Aña pasa 55 porciento di nan a dicidi pa stop cu e estudio cu nan a scohe pa bay pa un otro den semester siguiente. Esaki ta casi dobbel di e percentahe di studiante di prome aña Hulandes.
Falta di preparacion
Segun parlamentario Desiree Croes (AVP), hopi studiante no ta bon informa riba e estudio of ta scohe pa un estudio basa riba conseho di nan mayor y no ta sigui nan mesun preferencia. Mas ainda e cambio rigoroso di un bida relativamente simpel y protehi na Aruba pa un bida den ciudad na un pais cu nan no conose ta cay studiantenan hopi pisa. Croes ta kere cu e falta di preparacion na Aruba ta pone cu asina hopi biaha studiantenan ta faya e prome aña.
Encuentro y workshop
Minister di Educacion Michelle Hooyboer-Winklaar tambe ta di opinion cu no tin suficiente informacion ni guia pa e studiantenan. Pesey e kier organisa un encuentro cu studiantenan cu ta bay afo. Tambe e kier ofrece tayer na esnan yegando final di nan scol secundario y lo bay focus hopi riba unda demanda ta pa profesionalnan nobo, por ehempel na scolnan.
Autor: Ariën Rasmijn