Potrèt: Belkis Osepa
KRALENDIJK – Un grupo chikí di mucha bonerianu a partisipá na Weganan di Rei den stadion na Kralendijk. Pa motibu di vakashon di skol i probablemente pa falta di transpòrt mayornan i muchanan a keda sin bini e evento.
Ounke ku e organisashon di Weganan di Rei a ferwagt kaba ku ménos mucha lo bishitá e Dia di Deporte di Reino, tòg e kantidat di mucha presente a desapuntá. Asina Dennis Martinus, kordinadó di e weganan na Boneiru, a bisa. Banda di dies or tabatin mas o ménos 93 mucha presente den e stadion, miéntras ku organisashon a konta ku 1500 mucha.
Belkis Osepa ta kombersá ku Dennis Martinus
“Aña pasá e muchanan tabata bini Weganan di Rei ku transpòrt di skol, huntu ku e maestronan”, Martinus ta bisa. “Awor nan mester bini ku nan mayornan i kisas nan no tin transpòrt.”
Tin intenshon pa kambia e organisashon otro aña, pa asina mas mucha por partisipá. “Ta bai parti e pasportnan ku informashon tokante hopi wega dibertido via e skolnan. Ta di spera ku otro aña sí e muchanan lo partisipá.”
Desayuno
Un bentaha di e kantidat chikí ku a akudí ta ku e kantidat di desayunonan ku a sobra por parti nan bou di famia pober. “Nan lo por hasi bon uso di e desayuno”, segun Martinus.
Outor: Belkis Osepa