Wilbert Stolte na su resepshon di despedida – potrèt: Extra Bonaire
KRALENDIJK – E mes ta papia relativamente leve tokante su tres añanan ‘ku mayoria di tempu tabata positivo’ komo Representante di Reino den Hulanda Karibense. Tòg for di prinsipio Wilbert Stolte tabata haña hopi krítika riba su funshonamentu.
E krítika no tabata bini solamente di Boneiru, Saba i Statia. Polítika na Den Haag tambe hopi be tabata sera frenta i den investigashon di Kordinashon di Reino a raportá ku Stolte a faya den su funshon di Representante di Reino. Entrante promé di mei e ta baha.
Eksperimento
Siman ku a kaba Wilbert Stolte a haña resepshon di despedida na e tres islanan. El a tene un gira di prensa tambe pa konta su banda di e historia. E splikashon di Stolte tokante e Kordinashon di Reino ta un konfirmashon di loke tin papiá masha tempu kaba na e tres islanan. Esta ku a traha un tutu ku e islanan BES. “Dia 10 di òktober 2010 a start un tipo di eksperimento. Un eksperimento masha bunita pero no tabatin un ehèmpel ku por a enfoká riba dje.”
Generalmente no por yama e relashon entre Stolte i e kuerponan públiko bon, asina e investigadónan di Kordinashon di Reino a evaluá. Ademas regularmente e tabatin konfrontashon, espesialmente ku gezaghebber di Boneiru e tempu ei, Lydia Emerencia. E no tabatin e konfiansa di e tres islanan i ta reproch’é di no a mustra un aktitut energétiko.
E mes ta haña ku e no tabatin sufisiente instrumento pa por hasi e trabou di kordinashon bon. E ta bisa ku el a skohe pa ‘diskushon i deliberashon’. “Hopi be bo por yega basta leu ku esakinan.”
Den e añanan bou di e Representante di Reino aki Boneiru a konosé un temporada turbulente. Stolte ta konfirmá ku e no a intervení, pero e ta indiká ku e medidanan pisá den e Lei kuerponan públiko Boneiru, Sint Eustatius i Saba (Wet openbare lichamen Bonaire, Sint Eustatius en Saba,WolBES) no ta kondusí na solushon. “Te asina leu ku mi sa nunka no a destruí un desishon. Nos a yega di diskutí sí si nos mester a hasi esaki òf laga. Generalmente nos a bini kla.”
Hulanda, tambe pa motibu di e Kordinashon di Reino ku te awe ta fayando, a disidí di duna e islanan mas partisipashon ora di hasi palabrashon tokante lei i regla nobo ku ta bini for di Hulanda. E Representante di Reino ku ta buska awor, aworó lo haña mas kompetensia. Asina Den Haag ke pone ménos preshon ehekutivo riba e tres kuerponan públiko di Hulanda.
Stolte ta kontentu ku gobièrnu hulandes despues di un debate ku Tweede Kamer a disidí pa, for di promé ku e reformanan estatal di 2015 kaba, hasi adaptashon pa mehorá e kordinashon di un gobernashon di Reino den Hulanda Karibense. WolBES ta un kopia di e lei munisipal, masha hulandes. Nos no tabatin eksperiensha ku e lei. Tabata un bulá den hundu. Mi por a konstatá ku no ta tur ora por ehekutá e konseptonan hulandes outomátikamente den Hulanda Karibense.”
Relashon ku polítika
Durante su temporada komo Representante di Reino Wilbert Stolte a haña krítika tambe riba su relashon ku polítika. Espesialmente oposishon tabata reproch’e di no ta pará riba polítika i di a ehersé su funshon partidista. Esaki ta relashoná ku su membresia di e partido hulandes CDA. CDA ta konsiderá e partido di koalishon lokal bonerianu UPB komo partido ruman. Segun Stolte relashonnan polítiko den Hulanda Karibense ta esensialmente diferente ku na Hulanda Oropeo. “Aki bo koló polítiko ta keda pega riba bo, sea bo ke òf laga. Ta masha difísil pa defendé bo mes kontra esaki. Si mi tabata kapas di trata tur partido na un manera igual? Apsolutamente ku sí. Mi tabata ke tur partido mesun bon.”
Korupshon
A menta Stolte den relashon ku korupshon tambe. Lo tabatin froude ku plaka di proyektonan di desaroyo via e Fundashon Desaroyo Antia (SONA). Su relashon ku polítikonan di UPB ku tabata sospechoso di froude tambe a persiguié.
Stolte ta distansiá su mes di e formashon di e imahen aki i ta kritiká prensa. “No ta agradabel. Ta masha fásil pa kopia tur sorto di relato di otro. Nunka niun hende no a bini aki bin puntra eksáktamente kiko ta kiko. Nò, mi no ta korupto.”
Tokante di e relashon ku polítiko korupto Stolte ta firme. “Bo sa kiko wes a bisa di esaki. Lo bo kere ku e ora ei lo bo lesa den korant algu manera ‘ta duel nos mashá ku nos a skibi kos desagradabel, aparentemente nos no tabatin rason’, pero esei si bo no ta mira.”
Stolte ta indiká ku e tabata sa ku e funshon lo no tabata fásil. “Pero semper m’a pensa ku esaki lo no ta relashoná asina tantu ku mi persona, sino ku mi posishon. Nunka mi no a tum’e na pechu personalmente.
Outor Belkis osepa