Eugène Abdul – potrèt: Belkis Osepa
KRALENDIJK – E Komishon di Konseho Referèndem ta proponé pa konsultá pueblo tokante e futuro estatal di Boneiru riba 12 di sèptèmber. Djabièrnè pasá e komishon a ofresé e rapòrt di konseho ‘Nunc Aut Numquam’ (awor òf nunka) na Konseho Insular di Boneiru.
Awor den e fase preparatorio kaba a surgi un problema. E miembro di komishon Ronald Coffy ku ta representá e partido di koalishon UPB, djis promé ku e presentashon a laga sa ku e tin un opinion diferente. Pa presidente di e komishon Eugène Abdul e karta di Coffy tabata un sorpresa.
Belkis Osepa ta papia ku Eugène Abdul
Fecha mas adekuá
Pero Abdul no ta kere ku un opinion diferente lo importá mashá. “E konseho por disidí loke nan ke. E trayekto di referèndem segun mi por sigui normal.” E komishon mester a duna konseho tokante e fecha mas adekuá i responsabel pa tene e referèndem, teniendo kuenta ku e próksimo elekshonnan di 18 di mart 2015 i e evaluashon di e státùs aktual ku ta tuma lugá na òktober 2015. E komishon ta skohe pa e fecha di 12 di sèptèmber.
Mester deliberá tokante e rapòrt ainda den Konseho Insular. E komishon ta duna konseho tambe tokante e preguntanan ku lo hasi den e referèndem i e eksigenshanan pa partisipashon na e konsultashon di pueblo. “E konseho tin un rapòrt kompleto. Asina nan por yega rapidamente na un desishon”, segun Abdul.
Kampaña polítiko
E miembro di komishon Ronald Coffy den su karta ta bisa ku e no ta di akuerdo ku e fecha proponé di 12 di sèptèmber, pasobra e ta kai un tiki den e temporada di kampaña polítiko pa e elekshonnan di mart 2015. E no ta di akuerdo tampoko ku e eksigenshanan ku e komishon a proponé pa partisipashon na e referèndem.
Outor: Belkis Osepa