“Mi ta Aubert Wiels danki na dje” – potrèt: Anneke Polak
WILLEMSTAD – Mientras ku Pueblo Soberano ta desvelá Plasa Helmin Magno Wiels, Aubert Wiels ta dal un serbes trankil di dje ku amigunan bieu di su ruman asesiná. “Un plenchi, un kaya, esta fiesta. Esnan ku tabata konosé Helmin di bèrdè mes sa ku e kosnan aki no tabata niun tiki importante p’e.”
Ruman muhé Marvelyne Wiels sí ta presente na desvelashon di e plenchi nobo. “Mi ta haña fis loke ta pasando. E ta lastra nòmber di nos famia. Marvelyne tin trinta aña ta biba na Hulanda, e no tabatin bon kontakto ku mi ruman hòmber. Akinan tin hende sintá ku a traha 36 aña ku Helmin.”
Aubert ta mustra riba e hendenan rònt di dje ku ta sinta dilanti di e edifisio di Un Tim Magno, e movementu ku resientemente a lanta ku mester kontinuá ‘e manera di pensa di Helmin Wiels’. Entre nan Karel Josefa, anteriormente bodyguard di Hèlmin.
Ruman grandi
No ta e partido so a plama for di otro despues di e asesinato, sino den famia tambe por ripará esaki, Aubert ta bisa. “Marvelyne ta pará su so awor. Pero e ta mi sanger, ke men mi bon mirá mi no ke papia di mi ruman muhé mes. Nos mama a fayesé na 2004, e tempu ei nos tata a fayesé masha dia kaba. For di e tempu ei ta Helmin a kuida nos, e tabata mi ruman hòmber grandi. E tabatin promé i último palabra. Nos por a yam’é dia i nochi, pa tur kos.”
Te ainda Aubert sa e tres numbernan di telefon di Helmin for di kabes. Un silensio ta sigui. “Ei banda, einan su graf ta keda”, Aubert ta mustra i ta keda mira su dilanti. “Mi ta Aubert Wiels danki na dje.”
E kos a afekt’é kon tur kos a bash’aden despues di morto di Wiels. “Úniko kos ku nos mester a hasi ta skapa e partido, esei tabata manera su yu. E ker a kue Kòrsou hasié un pais nobo, ku hustisia pa un i tur, pero kaminda tur hende lo a tuma nan responsabilidat tambe. Pero den partido Helmin no ta eksistí mas. Asta Stevie Wonder por mira esei.”
Segun Aubert e kos a faya pasobra a bini un direktiva nobo i a bah’é komo visepresidente. “Ta ora Helmin a hasi e partido grandi numa ku hende manera Ivar Asjes, Elmer Wilsoe i Jaime Cordoba a bin blo. E echo ku Asjes ta promé minister awor a straña mi, nunka mi no a tende Helmin menta su nòmber. Si e tabata na bida ainda lo e por a gui’é komo promé minister. Ounke e ora ei nunka Asjes lo no a sinta mas ku tres luna. I drink for that”, Aubert ta bisa i ta dal un trago di su serbes.
E karanan aktual di e partido, kende Aubert ta yama esnan pa prònk kuné, na un dado momentu a yega asina serka ku Helmin no por a sali for di nan mas, e ta bisa. “Asina Helmin a bisa mi diferente be. Tuma por ehèmpel Ingrid Sanchez, e ta diabel mes. Nan tabata pleita hopi, e tabata kibr’é spiritualmente. Ta solamente pa yuda mi ruman hòmber m’a drenta direktiva. Nan a mat’é djaden.”
Edifisio di 1 Tim Magno – potrèt: Anneke Polak
Malhechor intelektual
Mat’é na mod’e papia, pasobra Aubert no ta menta nòmber di e malhechornan intelektual. Tòg e ta bisa ku ta ‘fásil’ ku e sa ken tur a mata su ruman hòmber. “Ta un grupo di ocho pa dies hende asina. Mi no tin miedu di nan, nan sí tin miedu di mi. Dia 10 di mei, durante lansamentu di 1 Tim Magno, mi ta bai saka e promé berdatnan na kla.”
Durante di e hopi oranan ku Aubert a pasa ku su ruman Helmin den garashi ta traha riba outo, Helmin tabata kont’e hopi kos. “El a duna mi splikashon, konta mi ken ta su enemigunan, pasobra e tabata sa ku e dia lo a yega. Hopi hende a alertá mi tambe. E plan tabata pa tir’é mata for di 9 di desèmber 2012, riba dia di su aña. Nan no a logra.
Aubert ta bisa ku e mesun grupo ku a paga pa e asesinato, awor ta invertí pa keda sin solushoná e kaso. El a spera ku lo solushoná e asesinato mas lihé, pero e tin tur speransa den un bon fin. “Mi tin konfiansa den Ministerio Públiko, nan ta traha masha duru mes.”
Elekshon
Entretantu Aubert ta mira ku ta su tarea pa realisá Helmin su idealnan. E ta hari ora puntr’é si den futuro e ta bai para riba lista di partido. “Ora bini elekshon nos lo bira partido polítiko. Mester, nos ta bai kaba Helmin su trabou.”
Outor: Anneke Polak