Werner Wiels serka e piedra konmemorativo pa su ruman na Mari Pampun

Werner Wiels serka e piedra konmemorativo pa su ruman na Mari Pampun

WILLEMSTAD – Semper Helmin tabata bisa “si un kos pasa mi t’abo t’esun ku lo keda trankil i kuida e muchanan i e famia”. Esei ta eksáktamente loke mi a hasi ora mi a mira mi ruman hòmber drumí abou na playa tapá bou di un pañ’e bela blou. M’a pensa: OK ruman, awor mi ta keda trankil manera bo ta ferwagt di mi.”

 
Na palabra Werner Wiels, ruman di Helmin Wiels ku a tira mata eksáktamente un aña pasá na playa di Mari Pampun.

 
E ta deskribí den detaye kiko a sosodé for di e momentu ku el a tende di e tiru fatal. “Tabata sosodé mas be ku tabatin rumor ku algu a pasa Helmin, pero ora un bon amigu ku ta biba serka di Mari Pampun a yama mi, mi a tuma e situashon na serio. Mi a yama Mac Cijntje na telefon i m’a puntr’é kua hòspital nan a mand’é. E di: ‘Helmin t’aki ainda, mihó bo bini.’ Esei pa mi tabata e indikashon ku a kaba.”

 
Ko’i mala mucha
Famia Wiels ta nuebe ruman. Entre Helmin i Werner tin un aña so di diferensha di edat i nan tabata hopi pegá ku otro. “Nos tabata hasi hopi ko’i mala mucha”, Werner ta konta ku un sonrisa. Pa gran parti e ruman hòmbernan a lanta na Steenrijk, pero nan a nase na Westpunt i den nan hubentut nan tabata bai Bandabou pa aventura. “Bon mirá ami tabata mas malamucha ku Helmin i na kas hopi be e tabata sali na mi defensa.”

Helmin Wiels ku un di su Mazdanan kerí – potrèt Werner Wiels

Helmin Wiels ku un di su Mazdanan kerí – potrèt Werner Wiels

 
“Loke hopi hende no sa ta ku Helmin tabata loko ku outo. Mazda e tabata gusta mas ku tur i el a lanta un klup di Mazda. Pasobra el a insistí mi promé outo tabata un Mazda i ainda mi ta kore Mazda! Tabata su hòbi. Te na kabamentu di su bida el a keda tofer na e outonan ei. Ainda mi ta topa hende ku ta Helmin a yuda nan ku nan outo i nan ta bisa ku nan ta sinti su falta mashá.”

 
Payasada
Entretantu tin kuater sospechoso ta parse dilanti wes, bou di sospecho di a kometé e asesinato. Werner a laga dos seshon di korte pasa sin ku e tabata presente. “Ta un payasada. Tur e kosnan ei no ta trese mi ruman bèk. Mi ta preferá di dediká mi tempu na su dos yunan.”

 
Werner ta intimá ku e no tin masha konfiansa ku hustisia por solushoná e asesinato di su ruman. “E kaso den korte lo no trese e konklushon ku hopi hende ta ferwagt.” E ta duda ku e dunadónan di enkargo lo bini dilanti wes nunka.

 
Mensahe
Werner Wiels tin un teoria si ken ta e dunadónan di enkargo pero e no ke elaborá. “Mi ta preferá papia di e idea tras di e asesinato: nan ker a siña tur polítiko un lès. Pasobra si bo ta kapas di mata un hende públikamente asina, ta un mensahe bo ke duna.”

 
Segun e lo no sera esnan ku a duna enkargo. “Nan a kalkulá esaki kaba. Esakinan ta hende ku tin añanan kaba ku nan a traha nan ret, nan ta finansá partido polítiko, nan ta kumpra prensa i nan ta djòin na mesa ora mester huramentá mandatario. E asesinonan ta peon pa sakrifiká. E berdadero dunadonan di enkargo lo no kai. Ta eksáktamente nan poder Helmin ker a demaskará.”

Werner Wiels serka e piedra konmemorativo pa su ruman na Mari Pampun

Werner Wiels serka e piedra konmemorativo pa su ruman na Mari Pampun

 
Werner ta sostené e partido ku Helmin a lanta kompletamente. Pueblo Soberano a gana elekshonnan di òktober 2012. For di dia di e asesinato tin un partishon den e partido. “Ora e rei muri ta sigui un lucha pa poder. Esaki a pasa aworaki tambe. Ma eksperiensha ta mustra ku despues di tempu e partishon ta bira ménos i esi mi ta spera”, e ta bisa.

 
Werner tabata un skuchadó krítiko pa Helmin pero e ta enfatisá ku e no tin aspirashon polítiko. Semper mi a yuda mi ruman ketu ketu. Nos tabatin diskushon largu i mi ta kòrda bèk riba esakinan ora mi lesa sierto email i dokumento atrobe.”

 
Impakto
Werner no ta di akuerdo ku su ruman mas hóben Aubert, ku a kuminsá e movementu polítiko ‘Team Magno I’. “M’a bis’e ku e mester keda leu for di polítika. E ta basta grandi ma e mes mester karga konsekuensha tambe.” Su aktitut pertinente ta emoshonal. “Nos a pèrdè un ruman hòmber pa motibu di polítika. Tabata un shòk pa henter famia. Un ruman muhé ainda ta sufri di e trouma. Mi tanta tur luna riba dia sinku ta bira emoshoná pa motibu di loke ku a pasa. Un di e yunan di Helmin a stòp di studia. E asesinato tabatin un impakto enorme riba nos tur.”

 
Outor: Leoni Leidel-Schenk