Marvelyne Wiels na kambio di nòmber di EEG-weg den Helmin Magno Wiels Boulevard – potrèt: Anneke Polak
WILLEMSTAD – Mientras ku un grupo di simpatisante di e polítiko asesiná Helmin Wiels ta asistí na un Santo Sakrifisio di Misa, un otro grupo ta na EEG-weg ku lo kambia di nòmber bira Helmin Magno Wiels Boulevard. Den e grupo aki su ruman muhé Marvelyne Wiels tambe ta presente. “Pa nos awor ta kla ken tabata stima Helmin di bèrdè mes, pero mas importante, ken a skuch’é tur e tempu.”
Marvelyne no ke papia di ruman Aubert Wiels i su movementu 1 Tim Magno. Úniko kos ku e minister plenipotensiario di Kòrsou ke bisa tokante e partishon den partido Pueblo Soberano ta ku e hendenan ku Helmin tabata konfia ainda ta forma parti di e partido.
Doló
Ta 5 di mei, eksáktamente un aña despues di e asesinato riba Wiels na playa di Mari Pampun. Awe Marvelyne a bishitá su graf na Veeris, pero el a bai e lugá kaminda a kometé e asesinato tambe. “Ta hasi doló pa mira e lugá sabiendo ku bo lo no mir’é nunka mas. Awe meinta m’a lanta i m’a repasá tur kos ku a sosodé aña pasá. Mi a pasa un meinta fastioso. E doló di mi rumannan, nan yunan, mi famia. Masha duru.”
Dies aña largu Helmin a forma parti di polítika, su ruman muhé ta konta. “Mi mama a fayesé na 2004, dies aña pasá. El a laga Helmin hura ku e lo no drenta polítika nunka. El a fayesé i algun siman despues Helmin a drenta polítika. El a bai traha pa e pais, e tabata ke pa kosnan bai otro. Hopi tempu nan a mir’é pa loko, pero despues nan a komprondé ku e tabata sa di kiko ta papia.”
Potrèt: Anneke Polak
Ambishon polítiko
Marvelyne mes nunka no tabatin ambishon di drenta polítika. Ya kaba e tabatin desena di aña ta biba na Hulanda ora Helmin a aserk’é. “Mi ruman hòmber tabata ke pa mi bira minister plenipotensiario, dia 24 di aprel el a firma un karta ku ken e ker a goberná. Ami tabata un di nan. Pa mi semper polítika tabata algu ‘leu fo’i kas’.” Marveline tabata kana na New York ora ku el a haña telefon di Helmin ku e mensahe ku tabatin un karta den su email ku e mester a firma i manda bèk. “Má pensa’he eh, bida ta bai kambia’ ma nunka mi no a kere ku e lo bai kambia di e manera aki.”
E ta sinti falta di e kombersashonnan ku su ruman. “Helmin den famia berdaderamente tabata esun ku bo por a papia kuné”, Marvelyne ta konta. “Helmin tabata tin un laso estrecho ku mi yunan, semper tabatin kombersashon ku nan, via ping òf app. E tabata padrino di mi yu hòmber tambe. Mes ora el a mira ku mi tabata na estado i e di ‘e yu ei ta di mi’. E tabata un tio fantástiko pa mi yunan.”
Energia
Helmin Wiels a siña su ruman muhé energia den aktuashon. Tambe den su funshon di minister plenipotensiario. “Mi ke pa nos hendenan siña karga responsabilidat. Biba ku loke bo tin i trata di spar. Of tuma paso pa bo sali mas di bon den bida. Nos no por keda warda hende hasi kos pa nos, nos mester karga nos mes responsabilidat. Si bo hasi esei bo por kuminsá pensa riba independensia, promé ku esei nò.”
Marvelyne ta haña ku ta un bunita gesto ku a nombra un plenchi i un kaya pa su ruman hòmber. Esei ta bunita si, pero Helmin ta aki den mi kurason, esei pa mi ta importante di bèrdè mes.
Outor: Anneke Polak