Lider di grupo Raimseline Hooi i direktor Charette Pinedo (r) den un di e espasionan di rekreashon di JJIC – potrèt Leoni Leidel-Schenk
WILLEMSTAD – “E luga ta manera un pueblo chikí”, direktor Charette Pinedo ta bisa mientras ku e ta kana riba e tereno di Justitiele Jeugdinrichting Curaçao (JJIC, ántes GOG). E ta mustra e diferente paviyonnan ku tur no ta okupá pasobra simpelmente no tin personal. Na JJIC ya ta añanan kaba ku nan mester yuda kurpa ku loke tin, mientras ta manera ku e kantidat di hóben ku ta desviá for di bon kaminda ta oumentá.
For di tempu ku el a lanta na 1949 e intenshon di JJIC ta di re-eduká. For di introdukshon di e Kodigo Penal nobo e medida PIJ (pa pone hóben den un institushon) ta na vigor. Esaki ta enserá ku den un temporada mas kòrtiku mester manehá e hóbennan mas intensivo. “Esaki ta pone un preshon enorme riba e instansha ku mester ekonomisá i traha ku ménos medio”, Pinedo ta bisa.
Falta di personal
E medio mas importante ta e hendenan ku ta traha ei. Ya pa añanan largu tin falta di personal. E businessplan ku a traha na 2010 tabata pa 44 trahadó, miéntras ku na e momento ei tabatin 47 trahadó i tabatin un plan pa yega na 54 trahadó na 2011. E parada di vakatura mas lat e aña ei a daña e asuntu. Aktualmente tin 34 hende ta traha ei.
Pinedo ta para serka un paviyon ku pronto lo renobá. E espasionan di drumi i di rekreashon ta hopi gastá. E lidernan di grupo ta trata na tapa esaki i laga e luga parse mas di kas posibel. Pero Pinedo no ta keha: “ántes e hóbennan mester a drumi den un sala grandi. Aworakí sikiera nan tin nan mes kamber di drumi.”
Algun paviyon tin hopi nesesidat di un renobashon
Reto
Raimselin Hooi ta lider di grupo. Kasi semper ta e so ta manehá un grupo. E tin sinku aña ta traha na e instansha kaba. “Ta keda un reto pasobra nos mester traha ku asina poko hende. Pesei mi ta laga e hóbennan yuda mi ku tur sorto di kos; ademas asina nan ta siña karga responsabilidat.”
SDKK
“Hoben hopi be ta haña ku serka nos nan a haña un kastigu mas pisá ku den prizòn pasobra aki nos tin regla”, Pinedo ta bisa. Pa falta di espasio i personal tin be mester sera hóben den prizòn SDKK. “Ei nan ta pa nan kuenta pa loke ta edukashon. Ta ora tin lugá so un delikuente hóben ta bai e departamentu será di JJIC na Rembrandtstraat. Ei tin lugá pa diesdos hóben, pero pa falta di personal i e mal estado di e edifisio ta atmití ocho so.
Konstrukshon di ocho sèl nobo ta kasi kla
Último simannan dos hóben a hui. A kue un di nan atrobe algun dia pasá. E departamentu será pronto lo muda bai e tereno di e departamento habrí. Konstrukshon di ocho sel – loke a primintí for di 2008 – porfin ta seka kla. Esaki ta aliviá Pinedo i e trahadónan sosial di hopi molèster. Konstrukshon di mas sèl, pa akohida speshal di ‘hóbennan di PIJ’ ta planeá pa 2016.
Roos Imperator ta warda mira. E ta un di e dos trahadónan sosial i for di 1992 e ta traha na JJIC. E ta falta man i tempu pa manehá e hóbennan manera mester ta. “Ku un edifisio bunita bo a solushoná solamente un kuart di e problema”, e ta bisa. Pa laga tur kos kore manera mester ta, segun e mester di tres trahadó sosial, un sikólogo i un terapista.
Wega di hunga siegu
For di 2011 e ta trata di traha ku ehekushon di e medida PIJ. “No tin kontinuidat, tin be bo no tin klaridat ta kiko minister ke i kiko e maneho ta ma bo mester splika bo klientenan si. Si algu pasa ku no ta bon tin hopi atenshon pero no tin follow-up. Tin be ta manera bo ta kana rònt ku un paña mará pa tapa bo wowo den un kamber ku yen di opstákulo kaminda bo mester mira kon bo ta haña bo kaminda.”
Outor: Leoni Leidel-Schenk