Staff di VNO contando votonan – foto: Ariën Rasmijn
ORANJESTAD — Partido CDA a resulta di ta e partido ganador na Aruba pa loke ta eleccion pa Parlamento Europeo cu a tuma luga ayera y antayera. Cu un total di 313 voto, di cual 264 a bay pa e hoben Curasoleño Marc Frans nan a logra e resultado mas grandi. Ik Kies Voor Eerlijk cu Rudy Lampe riba lista a logra haya 249 voto, di cual 247 a bay pa Lampe mes.
D’66, cu hunto cu CDA a logra e miho resultado, a yega na un total di 110 voto na Aruba. PVV a haya 21 voto, mescos cu GroenLinks cu a combina lista cu PvdA cu a haya 59 voto. VVD a haya 32 voto, mientras cu SP a logra haya 16 voto, mescos cu Christen-Unie/SGP cu a combina lista cu CDA.
E partido Artikel 50 a haya 4 voto mescos cu Piratenpartij, mientras cu e partido IQ Rechten-Plichten-Partij a haya un voto so, mescos cu e partido Aandacht en Eenvoud. Partido 50 Plus a haya 10 voto y De Groenen no a logra haya ni un voto na Aruba, mescos cu e asina yama Anti-EU Partij. De Liberaal-Democratische Partij a haya 3 voto mientras cu e partido Jezus Leeft a logra haya no mas cu 2 voto.
Partij Voor De Dieren a haya un total di 7 voto na Aruba 1078 hende a registra pa vota aki na Aruba. Un total di 871 votadornan a entrega nan formulario pa vota, di cual 869 a deposita un voto valido ayera y antayera. Tabatin un voto invalido y un asina yama blanco stem. Ayera mainta a conta e parti di votonan cu a drenta antayera y ayeratardi despues cu e buzon a cera 3’or, a conta e di dos parti. No tabatin irregularidad den conteo y no a entrega obhecion.
Menos votador
Compara cu eleccion pa Parlamento Europeo na 2009, na unda Aruba a participa pa prome biaha y tabatin cu un total di alrededor 19.000 voto, e participacion e aña aki tabata basta abou. Segun Tanja Timmermans di VNO, e diferencia grandi aki tabatin di haber cu hecho cu na 2009 Mito Croes cu sosten di AVP a campaña agresivamente. Alavez tambe e novedad cu tabata prome biaha cu por a vota pa Parlamento Europeo a hunga un rol, asina Timmermans ta splica.
Geenstijl
Diadomingo awo tur e votacion di Europa lo drenta. Resultado final di eleccion pa Parlamento Europeo lo wordo duna ariba dialuna dia 26 di mei, asina Diederik ten Holder di VNO ta duna di conoce. Union Europeo a kies pa esaki pa asina por evita cu resultadonan na un pais por influencia esunnan na otro. Toch a anuncia e resultadonan na cada stembus, asina dunando tur oportunidad pa yega na pronosticonan hopi confiabel.
Como protesta contra loke nan ta yama un proceso no-democratico den cual mester warda dianan te resultado oficial ta wordo divulga siendo cu e ta cla caba riba mesun dia, e website Hulandes Geenstijl.nl a haci un yamado na tur su lesadornan pa acudi na nan stembus y reporta riba e proces-verbaal di e eleccion despues di e conteo bek pa Geenstijl.nl, cu e intencion pa e website por trece un propio resultado di e voto. Aki na Aruba, Robbert Hollander tabata esun cu a participa na esaki.
Autor: Ariën Rasmijn