Sentro elektoral Jong Bonaire – potrèt Belkis Osepa
KRALENDIJK – Dos pipita di bonerianu ta kana yega sentro elektoral na Kas di Hubentut Jong Bonaire pa tira nan voto pa elekshon oropeo. No solamente na Hulanda, sino tambe na Boneiru ta difísil pa entusiasmá hende pa Oropa.
Na Boneiru 11.229 persona por vota pa e kandidatonan pa parlamento oropeo. Te diesdos or un 250 hende a vota den un di e tres sentronan elektoral na Boneiru.
Fondo i supsidio
E votadónan ta di akuerdo: “Ta importante pa usa bo derecho di vota.” Mayoria di nan a prepará via buskamentu di informashon òf ku yenamentu di un stemwijzer. Parlamento oropeo por nifiká algu pa Boneiru masha bon, historiadó Arthur Sealy ta haña. Islanan BES por hasi uso di fondo i supsidia. Espesialmente riba tereno di desaroyo ekonómiko, industria, agrikultura, i enseñansa e habitantenan di e islanan por saka nan bentaha.
Chèlèlè
Sealy: “Ei den e komishonnan tokante derecho humano, agrikultura i hustisia nos por trese nos kasonan dilanti. Aki ta chèlèlè so sin hasi niun dònder. E kos ei mester kambia.” Peter van de Mosselaar di e lista nobo ‘Ik kies voor eerlijk’ ta kontentu maske e asistensha tabata abou. “Dia m’a kuminsá ku e kampaña mi tabatin e sintimentu ku niun hende lo no bai vota. Mi tin e impreshon ku tòg a motivá un grupo.”
Outor: Belkis Osepa