Polis ta marcha pa e edifisio di RCN – potrèt Belkis Osepa
KRALENDIJK – Sindikato di polis NAPB-BES no ta pèrdè kurashi i ta sigui lucha kontra e harmonisashon di salario ku a proponé. Ainda Rijksdienst Caribisch Nederland (RCN), doño di trabou di amtenar na Boneiru, Sint Eustatius i Saba, no a logra sera un akuerdo di cao kolektivo ku e bòntnan.
Djabièrnè mèrdia un grupo di polis a marcha pa ofisina di RCN. Den un karta e sindikato di polis ta pidi mas tempu pa sigui negoshá. Parse ku NAPB-BES ta e uniko bònt ku mester bòltu bela ainda.
E otro bòntnan di amtenar ABVO, STRAF/ACOM/ACP i WICSU ainda ta deliberá internamente. Pero segun direktor di RCN Sybren van Dam tin indikashon ku e bòntnan ke bai di akuerdo ku e proposishon nobo pa salario i kondishon laboral secundario.
Atras
Van Dam: “Mi ta komprondé e punto di bista di polis i mi ta komprondé ku nos no ta sufisientemente seka di otro. Ta ferfelu, sino masha ora nos lo a yega na un akuerdo.” Miembro di direktiva di NAPB-BES Steven Senior ta spera ku e partidonan lo yega na un akuerdo den e tempu ku ta bini. “Nos opstákulo ta e salarionan nobo. Nos ta bai atras.”
Outor: Belkis Osepa