Avion di Tiara Air – foto: BUVO
ORANJESTAD — E companianan local di aviacion Aruba Airlines y Insel Air a cuminsa haya pago di parti di nan entrada for di gobierno di Venezuela. Autoridadnan di e pais tambe a compromete nan mes pa paga e resto di placa cu falta.
Segun informe lo tin un ausente riba e lista di companianan cu ta haya nan cen y esaki lo ta Tiara Air. Director y propietario Alejandro Muyale no kier confirma ni desmenti cu su compania no a haya placa. Unico declaracion cu e kier duna ta cu ‘cos ta mustrando bon’ y si otro companianan ta hayando nan placa paga, no tin motibo pakico esaki lo no tin cu pasa cu Tiara Air.
Aruba Airlines
Aruba Airlines ta un di e companianan cu tambe ta bula pa Venezuela y tin cu haya nan entrada di ganashi na dollars for di e pais ey. Anteriormente director Onno de Swart a conta cu Aruba Airlines tambe tin un suma basta grandi wanta na Venezuela pero a logra mantene su mes riba pia via su inversionista. De Swart no kier divulga e suma total cu e tin cu haya ainda, pero ta splica cu e pagonan cu ta drentando aden aworaki ta pa desde januari di aña aki te cu awor. Ademas ta trata akinan di sumanan chikito.
A pesar di esaki, e suma mas grandi ta pa e lunanan di mei – 31 di mei 2013 Aruba Airlines a cuminsa bula extensamente pa Venezuela – te cu december aña pasa, den cual Aruba Airlines a bula mas cu nunca pa Venezuela. Pagonan pa e periodo aki no a drenta ainda, pero segun De Swart gobierno di Venezuela a aproba pagonan aki y a compromete su mes na haci esakinan. Aunke cu De Swart ta confirma cu su competidor Tiara Air – cu te ainda ta depende pa gran parti riba mercado Venezolano – no ta aparece riba e lista di companianan cu ta hayando nan entrada di 2013 y 2014 paga, e tambe ta haya cu no por paga un anto keda sin paga un otro.
Suspension di pago
Tiara Air te ainda ta den un periodo di suspension di pago den cual ta purbando di haya inversionista pa injecta placa den un incarnacion mas chikito di e aerolinea y paga e creditornan. E compania ya caba a manda gran cantidad di nan trahadornan cas pa asina alivia gastonan.
Tiara Air te hasta a perde su licensia temporalemente ora a manda managernan cas. For di Venezuela Tiara Air mester haya un total di casi 30 miyon dollar. Gobierno di Aruba a regala un suma di 1 miyon dollar pa cubri gastonan pa un siman y a participa den negociacionnan cu gobierno Venezolano pa yega na un areglo di pago. Mientras tanto DAE, un otro compania local di aviacion, a canta bancarota pasobra nan a keda mucho tempo sin haya nan entrada for di Venezuela.
Autor: Ariën Rasmijn