Konstruí di kloaka na Boneiru – potrèt: Belkis Osepa
KRALENDIJK – Un gran parti di Kralendijk for di kosta te mas paden di e siudat ta konektá for di e siman aki riba e sistema di kloaka públiko. Un logro grandi pa Boneiru, pasobra anteriormente e awa sushi di tur kas i negoshi tabata kore drenta un berpùt òf tanki sèptiko. Gran parti di e awa aki ta disparsé despues den tera.
E proyekto di kloaka na Boneiru ta un invershon mionario paga for di fondonan di desaroyo. For di aña pasá a kuminsá un investigashon dje ofisina di investigashon OLAF di Komishon Oropeo pa wak kon ehekushon di konstrukshon dje proyekto a bai. Segun lider di e proyekto Franklin Blom e proyekto a kosta sigur 35 mion di euro. Despues di un tardansa di un aña i mei a yega e kulminashon ku konekshon na e sistema di kloaka.
Awa pretu
De e promé fase lo konektá kasi nuebe shen kas, hotèl i otro edifisionan na e sitema di kloaka. Tambe e instalashon nobo pa purifiká awa no ta den uso permanente. For di e siman aki ta drai un klèp ku ta pone e asina yamá ‘awa pretu’ kore drenta e ret nobo di kloaka. E instalashon di e ret di kloaka i tambe e sitema nobo pa purifiká awa tin su benefisionan grandi, segun lider di e proyekto Franklin Blom. “E tin balor grandi pa kuida nos refnan. E ta yuda sostené nos ekonomia di buseo.”
Na diferente lugá tabata difísil pa konstruí e kloaka pa motibu di e tera duru. Tambe ta asina ku na sierto lugá e berpùt òf tanki sèptiko ta situá bou òf hopi serka di e edifisio, loke ta hasi e trabou mas difikultoso. José Manuel Vieira a yuda pone hopi dje tubu di kloaka. “Na diferente lugá mi mester a koba te drenta berpùt pa hasi e konekshon nobo. No tabata trabou fásil.” Vieira tambe ta mira e benefisionan di e kloaka nobo ku ta kontribuí na un medio ambiente limpi.
Outor Belkis Osepa