Kurt Schoop ta papia ku habitante di Otrobanda – potrèt: Dick Drayer
WILLEMSTAD – Habitante di bario, empresario i organisashon na Otrobanda e fin di siman aki a bini huntu pa papia tokante pobresa na Kòrsou. E lunanan binidero bou di guia di facilitator lokal lo tene e tipo di seshon di diálogo aki den diferente bario na Kòrsou. Lo usa e input di e seshonnan pa traha un plan di desaroyo nashonal.
Esaki ta sosodé bou di guia di e Organisashon di Desaroyo di Nashonnan Uní, UNDP. Nan ta ehekutá e proyekto ‘Kòrsou Kapasitá: inkluí hende i inspirá mente!’ Un di e metanan ta pa duna e habitantenan di bario e implementonan mental pa dil ku nan propio problemanan. Diálogo ta forma parti di esaki.
Dick Drayer tabata na Otrobanda e wikènt aki i el a traha e siguiente reportahe
Segun Kurt Schoop di Federashon Otrobanda habitante di bario mester pone nan orguyo un banda i koperá. Espesialmente den e área di trabou ta importante pa hende generá mas entrada. E aserkamentu di UNDP ta sostené e idea aki i ta duna e hendenan un sintimentu di nan propio balor ku e implementonan nesesario pa kuminsá traha.
Outor: Dick Drayer