“Ta famia mester a konstatá ku e infüs tabatin oranan largu kaba sin kore”

“Ta famia mester a konstatá ku e infüs tabatin oranan largu kaba sin kore”

WILLEMSTAD – “Mi mama mi no ta haña bèk, pero e kos aki no por sosodé un biaha mas.” Yara ta konta kon tres aña pasá su mama a yega na departamentu di Promé Asistensia di Hòspital Sint Elisabeth (Sehos) ku keho di diarea i a muri e mes dia. A lag’é pa su kuenta sin ayudo adekuá ocho ora largu.

 
“Ta famianan mester a konstatá ku e infüs tabatin algun ora kaba sin kore i a notifiká dòkter.” A anotá e seri di fayo ku a kometé despues ku a atmití su mama Ilene Garcia Medema den un rapòrt di keho di Inspekshon di Salubridat.

 
Keho
Den e rapòrt di Inspekshon por lesa ku ta for di kuminsamentu kos a bai malu. Kaminda ku den atministrashon di servisio di ambulans tin pará ku e pashènt a yega seis minüt pasá di dies, e diario di Promé Asistensha ta pone e atmishon na binti pa diesdos. No a skibi kiko a sosodé den esun ora i mei. Yara mes ta duna e kontesta: “Mi a kana bai e kantina diferente be pa pidi nan wak mi mama. Djei sin listr’é nan a dun’é un remedi pa para infekshon, miéntras ku e no tabatin infekshon.”

 
E internista di warda no a haña nesesario pa bini i segun inspekshon via telefon a duna un plan di tratamentu na e ko-asistente. Pa motibu di fayo den komunikashon no a start e plan di tratamentu aki. E anochi ei Yara su mama a fayesé.

 
‘Sòri’
Den e rapòrt tin pará ku ta difísil pa determiná si e lo tabata na bida ainda si e tratamentu a bai un otro manera, pero ta bisa si ku por reprocha e internista i Sehos komo organisashon riba hopi punto. A pasa e kaso pa Kolegio Disiplinario. Segun Yara einan a papia dies minüt ku e dòkter di warda i ku un simpel ‘sòri’ a kita e kos fo’i man. “Ora despues mi a bai reklamá serka wes e kontesta tabata: pero at’el a bisa sòri?”

 
Despues ku su mama a fayesé kos a sigui bai malu; kaminda famianan i e internista enfátikamente a indiká ku nan ta pèrmití solamente un outopsia di barika, tòg a hasi un outopsia di kabes tambe. “Ora nos a haña nos mama pa entiero su kabes tabata tur na sanger. Esei tabata un konfrontashon hopi doloroso.”

 
Despues di un operashon di rudia a duna Thea un infüs pa suavisá e doló teribel den e rudia. “Henter anochi mi tabata muri di dolo”, Thea ta bisa. E verplesternan tabata haña ku mi tabatin hopi doló pasobra mi tabata move muchu. Na final nan tabata ninga di bini ora mi primi e bèl yama nan.” Manisé e dòkter a deskubrí ku e infüs no tabata kore. “Ni sikiera un despensa e verplesternan no por a pidi”, Thea ta bisa sínikamente. Ainda e no a duna keho pasobra un di e dianan aki e mester operá su otro rudia tambe.

 
Laso importante
Èks verplester Marijke Fontilus a traha 26 aña na Sehos. E ta tira falta di e fayonan entre otro riba e edukashon di verplester ku a bai atras. “Verplester ku a kaba di studia mester siña traha un aña i mei pasobra nan no ta haña sufisiente lès di práktika. Pasobra tin falta di personal hopi be ta siña e verplesternan nobo traha bou di verplester ku no ta kla pa esaki ainda.” Segun e tur hende mester por mira ku un infüs no ta kore. Ta hopi slòns pasobra bo ta obligá di kana un ròndu regularmente. E verplesternan ta un laso importante, pasobra nan ta ku e pashèntnan 24 ora pa dia. Bo ta wowo i orea di dòkter.”

 
‘Money making’
Fontilus ta bisa ku e ta hopi prekupá awor ku a remplasá e ‘bieunan’ ku trahadó nobo. “Lo mi no ke haña mi ta bai hòspital”, e ta bisa. “Lástimamente aktualmente kuido médiko ta un ‘money making business’. Dia mi a kuminsá traha na aña ‘85 esaki no tabata asina.”

 
E nòmbernan Yara i Thea ta fingí pa motibu di privasia

 
Outor: Leoni Leidel-Schenk