Centro Colorado, un di e facilidadnan di FMAA. Foto: Ariën Rasmijn

Centro Colorado, un di e facilidadnan di FMAA – foto: Ariën Rasmijn

ORANJESTAD — Futuro di cuido pa adictonan ta colga na un hilo atrobe. Trahadornan riba contract na Fundacion pa Maneho di Adiccion Aruba (FMAA) ta bisa cu a kita 15 di nan y cu tin 15 mas pa bay, poniendo basicamente gran parti di e operacion riba su lomba. Sinembargo, oficina di minister di Husticia Arthur Dowers ta indica cu den proximo dos siman lo bay reconsidera retironan aki.


Un trahador cu kier keda anonimo ta duna di conoce cu su persona y cantidad di otro trahador, entre nan cu contract vigente te cu 2016, a wordo manda cas. Ta trata specificamente di trahadornan riba edad di 60 aña y esnan cu a drenta ultimo den FMAA.

 
‘Double trouble’
Trahadornan aki tabata traha den staf medico di FMAA, of tabata trata clientenan ‘double trouble’, pues cu adiccion y problema mental, pero tambe tabata duna les di musica den entre otro e cas pa clientenan femenino of duna les di arte of deporte. “Net e hendenan aki a wordo tuma pa hiba cuido di adictonan dilanti, locual poco poco tabata logrando. Kitando nan for di trabou ta trece FMAA bek na comienso”, asina e trahador ta splica.

 
Hendrik Tevreden, cu tambe ta traha na FMAA, ta conta cu ayera mainta minister Dowers a duna di conoce cu e lo bay re-evalua e retironan aki un biaha mas, aunke cu tin un grupo cu con cu bay bin lo mester bandona FMAA. Evaluacion aki lo bay tuma dos siman, y despues lo bay bek pa laga trahadornan di FMAA sa. For di oficina di minister Dowers a haya confirmacion cu esaki en berdad ta e caso. Ambos Tevreden y e trahado anonimo ta bisa cu e trabou lo bay mester wordo tuma over pa hendenan cu tabata caba den vaste dienst pero cu den hopi caso ta malo na cas pa hopi tempo.

 
E trahado anonimo ta bisa cu e tin miedo cu net e clientenan ‘double trouble’, cu ta esnan mas problematico, lo haya nan mes riba caya atrobe. Trahadornan ta mirando riba propio iniciativa awor con nan por keda yuda e grupo di adictonan aki y tene nan for di caya. Tevreden di su banda ta premira situacionnan den por ehempel un trahador lo bay mester cuida 20 cliente durante un shift di anochi.

 
Tabatin un demostracion planea pa awe mainta, pero mirando e promesa di e minister pa wak kico por haci a pone esaki un banda. “Pero si nos no tende nada aki dos siman, nos lo haya nos mes forsa pa tuma accion”, asina Tevreden ta duna di conoce. No por a haya contacto cu directiva di FMAA pa un reaccion.

 
Eror administrativo
Fin di april ya caba a hera kita alrededor di 40 trahador na FMAA den cuadro di corta gasto di gobierno cortando contractant den aparato gubernamenal. Tempo aya a mustra minister riba hecho cu trahadornan aki nan contract ta asina bon hinca den otro cu si nan hiba gobierno corte, nan lo gana e caso. Na april contractantnan a haya di compronde finalmente cu solamente 10 di nan cual contract lo caba of cu a yega edad di 60 aña lo wordo kita. Retiro di 40 trahado lo tabata accidental, pa via di un eror administrativo.

 
Autor: Ariën Rasmijn