Ramonsito Booi i Burney El Hage – potrèt Belkis Osepa
KRALENDIJK – Na Boneiru a lanta kontroversia rònt di e partisipashon di èks diputado Burney El Hage (UPB) den e siman binidero na Hulanda Karibense (HK). E bishita di miembro di konseho insular Ramonsito Booi na Hulanda tambe ta haña hopi krítika.
Tur hende ta warda mira e reakshon di promé minister Mark Rutte i parlamento hulandes despues di e asuntu Illidge durante di e Deliberashon Interparlamentario di Reino (IPKO) na Den Haag. Gezaghebber suplente Edison Rijn mañan ta tene un konferensha di prensa tokante di e asuntu.
Poko tempu pasá a eksonerá Booi i El Hage den e kaso di korupshon Zambezi, pero Ministerio Públiko a apelá e kaso.
Miembro di konseho Robby Beukeboom di Partido Demokrátiko a pidi Rijn pa pidi e dos kabeyeronan ‘na fini manera’ pa no bai. E tin miedu di e publisidat negativo pa Boneiru pero e ta kritiká Den Haag tambe. “Polítika na Den Haag ta midi ku dos midí. Nan ta kritiká Illidge su presensia pero den pasado nan a risibí Booi i El Hage man habrí.” Fiskal mayó David van Delft ta konfirmá ku tur dos ta sospechoso ainda.
Wega polítiko
Diputado i lider di partido UPB James Kroon ta bisa ku ta un wega polítiko. “Pueblo a skohe Booi komo miembro di konseho anto ora e kaso tabata den korte kaba el a bai Hulanda masha hopi be. Tur e biahanan anterior El Hage a manehá e asuntunan finansiero. Kaso Zambezi a sera.”
Outor: Belkis Osepa