Potrèt: Dulce Koopman
WILLEMSTAD- Studiante, dosente i mayor ta determiná: Gobièrnu mester kita for di mesa e medidanan ku el a tuma den kuadro di ekonomisashon di gastu den enseñansa.
Esaki ta loke a resaltá djaweps atardi durante di e akshon di firma ku e studiantenan a organisá na Stadion Pedro Odulio Willems na Suffisant pa haña sosten di komunidat. E medidanan ta konta pa enseñansa avansá i enseñsansa sekundario di fishi (beroepsonderwijs).
Dulce Koopman a papia ku e akshonistanan na Stadion Pedro Odulio Willems
Algun dje medidanan ku gobiernu a tuma pa skapa sèn entrante aña eskolar 2014-2015 ta: redusí e kantidat di ora ku e studiante ta haña guia na skol. Entrante aña eskolar 2014-2015, ta surgi kambio den e asina yamá sistema di ‘stapelen’, ku ta ún dje medidanan ku a kousa hopi preokupashon. No ta finansiá mas un opleiding despues ku a risibi kaba un kwalifikashon di start. Ta posibel solamente pa un studiante sigui un edukashon inisial i ta permití únikamente kambio den kurso di e promé aña di estudio.
Drop outs
Den kaso ku gobièrnu no revoká e medidanan e ta kómplise di hóbennan ku ta kai den pèrdishon, asina e aktivistanan a enfatisá. Carina Ruiter, bosero dje studianenan i alumno di Frater Aurelio SBO ta splika ku e studiantenan no ta sosegá mientras ku bari e lei for di mesa. “Si mester ekonomisá hasié riba algu otro pero no riba enseñansa “, segun e studiante.
Si minister di enseñansa keda insistí pa implementá e medidanan, e ta promove dropouts , kriminalidat i kasonan di atrako, pasobra esaki ta konsekuensha direkto dje medidanan. Carina Ruiter ta supliká minister di enseñansa pa skucha e sklamashon dje hóbennan.
Dosente i mayor
Sharon Phelipa, ta un mayor preokupá. Su yunan a kaba di pasa EFO toets i tin posibilidat ku ún di nan ta bai VSBO. Phelipa a partisipá na e akshon, pasobra e ta realisá ku si e chèns dje studiantenan di VSBO ta asina limitá, ta algu di lamentá profundamente . “E situashon aki no ta stimulá e alumnonan pa logra mas tantu den bida”, segun e mayor preokupá. E hecho ku e studiantenan a kuminsá ku e akshon ta di aploudí. Asuntu di malinterpretashon dje lei, manera ku minister Dick a konstatá, no ta kuadra segun e mayor.
Suhaini Silberie, dosente na Frater Aurelio SBO ta konfirmá ku e preokupashon no ta reina solamente serka e alumnonan, pero tambe den seno dje dosentenan. “Doló di studiante ta doló di dosente tambe”. Ta pesei e dosentenan ta sostené e alumnonan shen porshento. Ademas e dosentenan tambe a konkluí for dje karta di medidanan, ku ta limitá e posibilidatnan di enseñansa dje studiantenan.
Defensor di derecho di mucha, Keith Carlo ta bisa ku e plan di gobièrnu ta kontra dje tratado di Derechonan di Mucha . “E ta un plan malu i diabóliko”. E ta bai krea mas desempleo serka hubentut i kriminalidat serka hóbennan. Esaki miéntras ku e stapelplan ta hustamente pa evitá esaki.
Minister di enseñansa Irene Dick ta lamentá ku tin interpretashon robes dje medidanan di gobièrnu. E mandatario ta rechasá ku ta stroba alumno den nan desaroyo. Primeramente minister Dick ta reuní próksimamente ku e Direktivanan di Skol despues informá komunidat korektamente ta kiko e plannan ta.
Outor: Dulce Koopman