Avion di Tiara Air. Foto: BUVO
ORANJESTAD — Minister Venezolano di Transporte Acuatico y Aereo Hebert García Plaza a anuncia antayera via su cuenta di Twitter cu su gobierno a acorda cu entre otro Tiara Air, Insel Air y Aruba Airlines pa porfin cumpli cu pagonan atrasa di entradanan di 2012 y 2013. Consulado Venezolano na Aruba a manda un comunicado tambe confirmando esaki.
A tuma contacto cu Claudia Acacio, consul de primera, y a haya di compronde cu berdad a cuminsa haya pagonan, pero cu no ta na consulado pa divulga detayenan di e pagonan. Onno de Swart, co-propietario di Aruba Airlines, ta bisa cu ya dos siman pasa a yega na e areglo aki cu minister Plaza na Venezuela. A acorda cu Aruba Airlines lo haya cuater pago. “E prome pago a drenta diabierna pasa.”
Cua sumanan ta envolvi, De Swart no kier a bisa, pero hecho ta cu e companianan local lo no bay haya nan pago completo na cash. Parti di e pago pa 2012 y 2013 lo bay ta den descuento riba combustibel. “Representante di tur compania tabatin nan mesun cita cu e minister. A negocia, a pone awa den biña y tur compania a bay di acuerdo cu e paketenan cu a wordo ofreci”, asina De Swart ta duna di conoce.
Motibo pakico Venezuela no ta paga e sumanan completo den efectivo ta pasobra e periodo di 2012 y 2013 tabata prome cu e Bolivar a devalua na un manera basta duro. Pesey mes tambe companianan a cuminsa haya pago pa 2014. “Pa 2012 y 2013 nan a keda purba ofrece diferente alternativa, manera paga esaki na fuel so. Nos no a acepta esaki. Pa cuminsa nos no mag ateriza un avion cu sobrepeso di combustibel na Aruba”, asina De Swart ta splica.
Mas vuelo pa Venezuela
Awo cu e placa cu tabata debe nan a cuminsa yega, Aruba Airlines tin pensa di habri un ruta lo mas lihe posibel pa Miami. E rutanan pa nan mercado mas grandi Venezuela ta keda habri, es mas, Aruba Airlines kier bay bula tur dia pa e pais. E idea ta pa biraun di e aerolineanan cu ta hiba Venezolanonan via Aruba pa Miami, cual te ainda ta un destinacion popular pa e Venezolano afluente. De Swart ta bisa cu e riesgo cu e situacion cu a pasa lo ripiti ta algo cu mester biba cu ne, pero e tin fe den e sistema nobo cu a reemplaza Cadivi y cu lo percura pa aerolineanan lo haya pagonan tur luna.
Abogado Eugene Martis, cu ta actua como bewindvoerder pa Tiara Air den su suspension di pago, ta confirma cu gobierno Venezolano a yega na un areglo di pago cu e compania. Tiara Air mester haya alrededor di 30 miyon dollar na entrada genera for di Venezuela. Pa falta di pagonan, e compania a haya su mes na rand di bancarota. Pa e compania aereo DAE e pagonan necesario ta yega mucho laat. Ya na september aña pasa e aerolinea a canta bancarota pa falta di pagonan for di Venezuela.
Autor: Ariën Rasmijn