Potrèt: Dick Drayer
WILLEMSTAD – Dosente ta masha malkontentu ku e ekonomisashonnan di gobièrnu kaminda enseñansa mester entregá hopi. “Gran parti di nos hubentut su situashon na kas ta malu, tin hopi problema sosial, sin nos guia nan ta pa nan kuenta”, un dosente rabiá ta reakshoná.
Ta bai kòrta den guia di alumno ku un retraso di siñamentu, asina minister di Enseñansa Irene Dick a anunsiá siman pasá. Manehonan di skol a reakshoná i a deliberá ku e minister. Sin resultado, pasobra a tuma e desishon i Konseho di Minister a aprob’é.
Dick Drayer tabata na e reunion privá i a papia ku dos dosente
Un otro medida ta ku alumno di sbo no por sigui pa un nivel mas haltu. Ademas despues ku nan hasi 24 aña nan no tin derecho mas riba finansamentu di Enseñansa. “Ke men nan mester bai un skol privá numa, loke nan no por paga”, un di e dosentenan ta bisa.
Djamars meinta e dosentenan ta tene un rueda di prensa kaminda nan lo pidi minister anulá e medidanan. “Sino lo sigui akshon pisá.”, un di nan ta bisa. “Anto no ta importa ku pronto vakashon grandi ta kuminsá: “na ougùstùs mester habri porta normal atrobe, nos tin pasenshi.”