Lansamentu Archivo Boneiru – potrèt: Belkis Osepa
KRALENDIJK – Bonerianonan por kontribuí na nan propio istoria i kultura. Fundashon Plataforma Kultural i Fundashon Históriko Kultural Boneriano (FuHiKuBo) ta urgi boluntarionan pa duna nan aporte pa yuda pone mas tantu informashon posibel riba e wèpsait.
Na Boneiru tin hopi hende grandi ku hopi konosementu di otro hende. Tambe nan tin informashon balioso di antes. Wikènt último a lansa ofishalmente na Boneiru e wèpsait Archivo Boneiru ku ta fungi komo un banko di dato ku material oudiovisual, buki, revista korant i hopi mas. E kolekshon ta di Bòi Antoin ku for di añanan ochenta a kuminsá warda tur informashon ku tin di aber ku istoria i kultura di Boneiru.
Potrèt
Nicky Pietersz ta digitalisá mayoria dje materialnan riba e wèpsait. E trabou no ta difísil, solamente ta nesesario pa registrá e informashonnan nesesario pa kompaña e material, asina Pietersz ta bisa. Mester hende pa wak por ehèmpel e potrètnan i bisa ta ken e hendenan ta, unda a saka e potrèt i ki otro informashon ta nesesario pa publiká tokante e potrèt. Tin mas ku sinku mil potrèt riba e wèpsait.
Un di esnan ku ya ta duna su aporte ta Chinta Mercelina. E tin hopi konosementu di hende i informashonnan balioso di kosnan di antes. Merelina: “E wèpsait ta hopi importante, prinsipalmente pa muchanan di skol ku por haña hopi informashon di Boneiru. E isla a kambia hopi, e potrètnan ta duna nan un idea kon tabata antes.”
Outor: Belkis Osepa