Entusiasmo serka un grupo chikí di alumno di havo i vwo ku a slag na Liseo Boneriano
KRALENDIJK – “Mi no por bisa nada otro ku e resultadonan di èksamen di vwo na Boneiru ta un desaster.” Asina direktor di unit Joost Latiers ta reakshoná un dia despues ku a anunsiá e resultadonan di èksamen na Liseo Boneriano. Solamente 33 porshento di e alumnonan ku a pasa èksamen di vwo a slag.
Latiers ta bisa ku e ta ‘sumamente sorprendí’ pa e porsentahe abou aki. “Te na desèmber ta bèrdè ku e alumnonan tabata presta malu na skol. Pero den e di dos parti di e aña di skol nan a hasi nan èksamennan di skol basta bon. Tòg nan a kai masha atras mes na e èksamen sentral por eskrito.” Aña pasá tambe Latiers tabata haña e resultadonan di èksamen final desapuntante.
Atraso di lès
Na Liseo Boneriano, e unit di havo/vwo di Scholengemeenschap Bonaire (SGB), seis di e diesshete alumnonan ku a hasi èksamen final a slag. Sobra a drùip. Na havo 56 porshento di e alumnonan ku a pasa èksamen a slag. E porsentahe aki ta algu mas haltu ku aña pasá (52 porshento).
For di kuminsamentu di e aña aki e alumnonan di èksamen di Liseo Boneriano a bati klòk. Nan a ekspresá nan prekupashon ku e atraso di lès ku tabatin na skol. Nan a indiká ku nan tin miedu ku nan no ta bon prepará pa hasi èksamen. Segun Latiers e tempu ei no por a papia di atraso struktural. Latiers ta indiká ku alumnonan di vwo espesialmente a presta malu den e materianan eksakto manera físika, kímika, biologia i matemátika B.
Diferensha ku Hulanda
Latiers ta bisa ku ántes e skornan di Boneiru tabata e mihó di Antia Hulandes. “Ántes Boneiru tabata skor entre 80 i 90 porshento.” Ounke Bopneiru ta un munisipio ekstraordinario di Hulanda tin un diferensha grandi den e resultadonan di èksamen final na Boneiru i na Hulanda. Na Hulanda mas o ménos 95 porshento ta slag pa e eksamen final di vwo (Liseo Boneriano 33 porshento) i na havo e porsentahe aki ta entre 85 i 90 (Liseo Boneriano 56 porshento)
Enseñansa na Boneiru ainda ta lucha ku atraso riba kasi tur nivel di skol. Na novèmber di aña pasá e dosentenan di SGB a bati alarma durante di e bishita real na e isla. Nan a organisá un protesta pasífiko. “Den tur área enseñansa meresé hopi mas atenshon”, e tempu ei Gilbert van Arneman, sekretario di e bònt di enseñansa Simabo, a bisa. Esaki pasobra ministerio di Enseñansa, Kultura i Siensia a kòrta den finansamentu di SGB. Van Arneman tabatin miedu ku e alumnonan lo bira víktima di e ekonomisashonnan den enseñansa. Ta manera e resultadonan di e èksamen final ta konfirmá e miedu aki.
Falta di plaka
Latiers tambe ta menta ku Hulanda ‘a sera e kranchi di plaka’, loke a pone ku e skol no por traha adekuadamente na proseso di mehorashon. “Nos falta finansa. Den Haag ta bisa: boso ta gasta muchu plaka. Miéntras ku nos ta bisa: Den Haag ta duna nos muchu poko. Nos mester a ekonomisá pisá. E ora ei kasi bo no por traha riba proseso di mehorashon.
Meskos ku e bònt di enseñansa Latiers ta enfatisá ku mester invertí mas den enseñansa. E dosentenan mester papia ku otro tokante mehorashon den enseñansa, e ta bisa. Riba e pregunta kon por mehorá e resultadonan di èksamen Latiers ta bisa ku no opstante e ekonomisashonnan e skol mester duna lès mihó, mester invertí mas tempu den preparashon i motivashon di e alumnonan. “No mester di plaka pa esaki.”
Outor: Belkis Osepa