Entusiasmo serka un grupito chikí di alumno di vwo ku a slag na Liseo Boneriano
DEN HAAG – “A bira tempu pa un direktor nobo pa Scholengemeenschap Bonaire (SGB). Mester manehá e direktiva di e skol tambe.” Asina sekretario di estado Sander Dekker di Enseñansa ta kontestá riba pregunta tokante di e porsentahe dramátikamente abou di alumno ku a slag pa havo/vwo na e skol.
E prekupashonnan pa e porsentahe di slag abou aki ta bini di parlamentario di PvdA Roelof van Laar. E ta bisa ku ta ‘úniko den historio hulandes’ ku asina poko alumno, un terser parti di e total, a slag i e ke sa ki medida ta bai tuma.
Dekker ta atmití ku e resultadonan ta desapuntante: “Espesialmente pa alumno ku a traha duru seis aña largu.” E ta spera ku e promé ròndu pa purba un biaha mas lo pone e kantidat di alumno ku a slag subi, pero por lo pronto esaki no ta sigur.
Inspekshon
Ta konosí serka e sekretario di estado ku e skol bonerianu ta presta ‘malu i suak’ i inspekshon tin su wowo riba e skol, e ta bisa. “For di 10-10-’10 ta traha duru pa subi e nivel.” E ta bisa ku e mehoramentu di e nivel lo no logra den un tiru, pero ku ta algu ku mester invertí aden pa largu tempu. “Mester bini un mihó maneho i mester drecha e maneho finansiero tambe.”
P’esei awor Van Laar ta pidi un solushon pa e grupo di alumno aktual, ku lo no probechá di solushon riba término largu. Dekker ta primintí pa wak kon ta pará ku e porsentahe di slagmentu despues di e ròndunan pa purba un biaha mas. “Si por ehèmpel skor malu espesialmente pa un materia spesífiko, mi ke mira ku ta posibel pa duna e alumnonan un mas chèns èkstra. Pero e ora ei e skol mester ofresé lès èkstra si, sino no tin sentido.”
Sera e skol
Si e skol boneriano tabata keda den e parti oropeo di Hulanda probablemente lo a ser’é, Dekker ta atmití despues di pregunta adishonal di Wassili Hachchi di D66. “Pero den e kaso aki esaki no por pasobra ta e úniko skol ku ta ofresé e tipo di enseñansa aki na Boneiru. Ke men nos mester keda traha ‘riba pa bini mehorashon. Di tur manera no por kulpa ekonomisashon, pasobra nèt den e skol aki a invertí èkstra último añanan.”
Outor: Jamila Baaziz