Marc Legrand – foto: Ariën Rasmijn
ORANJESTAD — Landsrecherche di Aruba a interoga un grupo di wardador di preso na prizon KIA ayera. Wardadornan aki tabata involucra den maltrato di un preso, despues cu el a agredi un di nan. Interogacion a dura un total di alrededor di 11 ora.
Ayeranochi coleganan y famianan di e wardadornan a keda warda dilanti oficina di Landsrecherche na Oranjestad riba salida di e ultimo wardador, Marc Legrand. “Mi ta hopi rabia”, asina el a declara na prensa, denunciando cu e y su coleganan ta wordo trata como sospechoso.
Durante interogacion a repasa cu Legrand e video di siguridad di e sucedido. Ta trata di un incidente cu a tuma luga den weekend cu a pasa, na unda cu un preso lo a agredi un wardador. “Na momento ey mi a perde cabes”, Legrand ta corda. E y un par di colega a agredi e preso di tal forma cu emester a bay hospital pa laga trata un wowo fractura. Despues di e tratamento, e preso a wordo manda cas, segun Legrand.
E ta bisa cu ta trata di un preso cu normalmente sa comporta su mes pero cu lo a actua bou orden di un of mas detenido cu tabatin problema cu e wardador en cuestion. “Boso por kima e luga, haci, bisa y menasa. Pero ora bo mishi cu un di nos colega ta algo otro. Nos no ta bay acepta esey”, asina Legrand ta duna di conose.
‘Guli manda abou’
Segun Legrand, minister di Husticia ta na altura caba di tur e problemanan cu tin, mescos cu e sindicatonan cu ta representa e wardadornan. “Ban wak kico minister y leiding lo bay haci paso si no haci nada, no ta yega niun caminda. Nos no ta bay tolera cu preso ta mishi cu coleganan. Si nan mishi cu colega, keremi cu e ta bay escala.” Legrand ta bisa cu wardadornan den nan trabou ta wordo limita.
“Pafo di KIA tin un maneho di zero tolerancia, pero na KIA nos mester guli manda abou pasobra parse cu preso tin mas derecho cu nos. Esaki ta algo cu pa basta tempo nos ta sinta na mesa cu minister pa discuti. Nos ta purba di reforsa esaki pasobra nos bida ta na peliger 24/7. Unabes bo drenta eyden, bo no sa si bo ta bay cas na ora of despues di 16 ora.”
Stress continuo
Segun Legrand, ya pa un luna caba desde cu dos preso a huy y a surgi un rebelion den prizon, tensionnan ta extremadamente halto na KIA. E ta bisa cu wardadornan ta wordo menasa y intimida continuamente dor di detenidonan. Oranan ta largo, wardadornan ta continuamente bou stress y nan no tin caminda pa hiba nan frustracion. “Nos a pidi minister pa trece un psicologo pa papia cu nos”, asina Legrand ta declara.
Presonan
Website Hulandes di Red Caribense a publica ultimamente un articulo cu ta describi e situacion na KIA for di punto di bista di presonan. Tres ex-preso ta declara cu falta di actividadnan, privacidad y diferente otro frustracionnan ta causa tensionnan continuo y cu presonan ta lanta contra wardadornan y manehantenan di KIA. Minister di Husticia Arthur Dowers ta reacciona riba esaki bisando cu ta pa via di mal comportacion di un grupo di presonan, tin menos actividad.
Autor: Ariën Rasmijn