Liseo Boneriano su unit di havo/vwo kaminda e alumnonan a presta malu na èksamen – potrèt: Belkis Osepa

Liseo Boneriano su unit di havo/vwo kaminda e alumnonan a presta malu na èksamen – potrèt: Belkis Osepa

KRALENDIJK – John van ‘t Hoff ta retirá komo direktor di Scholengemeenschap Bonaire (SGB). Direktiva a disidí esaki for di kuminsamentu di yüni. Tambe tin un konsepto di un akuerdo riba mesa pa plaka èkstra pa enseñansa i kuido. Fin di yüni sekretario di estado Sander Dekker di Enseñansa ta firma e akuerdo aki.

 
Direktiva di SGB a bisa esaki den un deklarashon por eskrito na prensa. A informá e dosentenan tokante futuro di e skol. SGB tabata den notisia último dianan despues di e porsentahenan dramátikamente malu di slagmentu di alumno di havo/vwo. Parlamentario di PvdA Van Laar a hasi pregunta den Tweede Kamer. Dekker a indiká ku a bira tempu pa un direktor nobo i ku mester tuma medida struktural.

 
Pregunta
Segun presidente di direktiva F. Lauxen a tuma e desishon pa no sigui ku Van ‘t Hoff for di 4 di yüni durante un reunion di direktiva. No ta konosí si Dekker tabata sa esaki kaba ora el a kontestá pregunta tokante e problemanan na SGB durante di e ora di pregunta riba 17 di yüni. Lauxen den e deklarashon na prensa: “Ta nos intenshon pa riba término hopi kòrtiku nombra un direktor interino pa un sierto tempu. Su enkargo ta pa e kuminsá un trayekto di mehorashon kaminda e promé resultadonan mester ta bisto bon kla den un aña.”

 
E presidente di direktiva ta indiká ku riba término kòrtiku lo mehorá e organisashon di e skol, kaminda ta boga pa mas koheshon entre e departamentunan. “Personal mester siña traha mas enfoká riba resultado i siña mehorá e ambiente na skol.” Riba término largu lo pone atenshon na e aktuashon pedagógiko di e dosentenan i e subimentu di e nivelnan di edukashon. SGB ta spera tambe di oumentá e responsabilidat di alumnonan i mayornan.

 
Plaka
Den e konsepto di e akuerdo ku a kumbiní ku ministerio di Enseñansa, Kultura i Siensia (OCW) a palabrá ku Hulanda lo pone supstansialmente mas plaka disponibel pa enseñansa i kuido di e alumnonan. Lauxen ta indiká ku lo pone e finansamentu riba mésun nivel ku di un pais oropeo, kaminda lo tene kuenta si ku e proporshonnan di gastu i preis na Boneiru.

 
Den e konsepto di e akuerdo tin pará ku lo kanselá e défisitnan eksistente. Asina SGB ta spera ku alumno ku mas problema por haña un mihó guia. Tambe SGB ta spera di bini na remarke pa previshon èkstra, supsidio i uso di areglo di stimulashon pa enseñansa manera ta kustumber na Hulanda oropeo.

 
Manera Dekker a indiká kaba den su kontestanan na parlamentu lo investigá si e alumnonan di havo/vwo por haña nan diploma ainda den un di tres temporada. Ainda OCW i SGB ta deliberando riba esaki.

 
Outor: Belkis Osepa