Foto: Ariën Rasmijn
ORANJESTAD — Durante ultimo lunanan e compania petrolero Valero a notifica gobierno di Aruba dos biaha cu nan ta hayando mas y mas dificultad pa haya partner of cumprado pa e refineria na San Nicolas.
Prome minister Mike Eman ta declara cu Valero lo kier sinta na mesa cu gobierno pa discuti un posibel desmantelacion y tambe nan obligacionnan pa cu Aruba unabes cu dicidi pa haci esaki. Sinembargo, na dado momento un partido interesa a presenta su mes y Valero a para discusionnan cu gobierno pa wak con leu por yega cu e posibel cumprado aki.
Ariën Rasmijn den combersacion cu prome minister Eman
“Nos tabata iniciando e procesonan ey ora cu nan a haya un interesado grandi. Nan a puntra e ora pa warda un un rato y awo nos ta riba espera di esey, pa e ora ey continua atrobe cu nan dependiendo riba kico e negociacionnan cu interesado aki lo por bira. Si esey no ta e caso nos ta bay bek mesa cu nan. Pero esey ta bay ta un proceso hopi grandi. Nos lo mester bay nombra comisionnan huridico, di medio ambiente, comercial y tur sorto di otro comisionnan pasobra un aspecto asina tin hopi trabou tecnico. Tin cu studia kico ta e responsabilidad huridico di Valero den caso aki. Kiermen esaki lo bay ta un proceso basta largo for di momento cu nos inicie “, asina prome minister Mike Eman ta splica.
Proposicion
E prome mandatario ta reacciona riba un supuesto carta cu e grupo opositor ‘Grupo di 7’ a circula, den cual un oficial halto di Valero lo a duna di conoce na un interesado cu nan no ta buscando activamente pa un cumprado pa e refineria na San Nicolas ya cu nan lo a cera un acuerdo caba cu gobierno pa desmantela e facilidadnan.
Prome minister ta nenga cu un acuerdo asina a wordo haci. “No, nan a bisa nos cu nan lo ta cla pa bay den direccion ey. Nan a pone esaki por escrito tambe. Nan a bisa cu nan lo kier habri combersacionnan pa esaki y haci proposicionnan tambe na gobierno riba kico nan ta sinti cu segun ley ta nan responsabilidad. Nan lo trece esaki den forma di proposicion y nos no a haya proposicion ainda.” Refineria ta cera for di 2012, ultimamente Valero a negocia hopi luna cu compania petrolero di Venezuela PDVSA pa mira si nan lo por tuma over e facilidadnan.
Pakete
Si acaso yega asina leu cu gobierno y Valero sinta na mesa pa discuti un desmantelacion, lo bay negocia un pakete completo, asina prome minister Eman ta splica. Aruba na su banda lo bay tin mester di expertonan grandi pa duna consehoriba kico tin y kico lo por ta e oportunidadnan pa proyectonan, te hasta den conhunto kizas. Eman: ” Nos ta pensando di envolve TNO y otro empresanan cu sa di e tipo di transicionnan y limpiezanan aki. Pero nos no a yega eynan ainda.”
Autor: Ariën Rasmijn